Ўзбекистоннинг Жиззах вилоятида 2 ГВт қувватга эга атом электр станцияси ва 110 МВт қувватга эга кичик АЭС қурилиши режалаштирилмоқда. Бу ҳақда Spot нашри бош вазир ўринбосари Жамшид Хўжаевга таяниб хабар берди.
Унинг сўзларига кўра, битта майдонда 1000 МВтдан иккита катта ва 55 МВтдан иккита кичик реактор жойлаштирилади.
«Мамлакат тарихида биринчи бўладиган, «Росатом» билан ҳамкорликдаги лойиҳамиз ноёбдир… Бундай комбинациялашган ёндашув бир вақтнинг ўзида 2,1 ГВт асосий генерацияни ва мослашувчан маневрли қувватларни беради», — дея қайд этди вице-премьер 25 сентябрь куни Москвадаги Глобал атом форуми йиғилишида сўзлаган нутқида.
525 гектар майдонни эгаллайдиган АЭС 2035 йилгача 15 млрд кВт⋅соатдан зиёд электр энергияси ишлаб чиқаради.
Россиянинг «Росатом» давлат корпорацияси бош директори Алексей Лихачев Ўзбекистон ҳукумати кичик АЭС майдонига иккита катта қувватли блок қўшишга қарор қилганини аниқлик киритди. «Биз Ўзбекистон ҳукумати билан бу мавзуда фаол иш олиб боряпмиз», — деди.
Атом энергетикаси агентлиги («Ўзатом») директори Азим Аҳмедхўжаев мамлакат кичик ва йирик лойиҳаларни уйғунлаштирган ҳолда атом энергетикасининг интеграциялашган моделини ривожлантириш ниятида эканлигини таъкидлади.
«Ўзбекистон амалда кичик модулли реакторларни жорий этишда пионер ҳисобланади. Биз уларни интеграциялашган ҳолда — катта реакторлар билан биргаликда ривожлантиришни режалаштирмоқдамиз, шу билан кенг компетенциялар мактабини яратамиз. Биз кичик модулли реакторларнинг яхши келажаги борлигини тушунамиз», — дея таъкидлади.
2025 йил июнь ойида «Ўзатом» агентлиги ва «Росатом» компанияси Ўзбекистонда йирик АЭС қуриш лойиҳаси шартлари тўғрисида келишув имзолаган эди. Лойиҳа иккита ВВЭР-1000 (ҳар бири 1 ГВтдан) энергетик блокини, тўрттагача кенгайтириш имконияти билан кўзда тутади. Асосий жиҳатларини ўрганиш, қурилиш қийматини баҳолаш ва шундан сўнг қарор қабул қилиш учун қўшма ишчи гуруҳи тузилган эди.
Август ойида Азим Аҳмедхўжаев Ўзбекистон ва Россия йирик атом электр станцияси қуриш имкониятини ўрганишни давом эттираётганини маълум қилган эди. «Катта станцияни энергетика тизимимизга улаш бўйича барча имкониятларни ўрганиш зарур», — дея қайд этди.
«Ўзатом» раҳбарининг сўзларига кўра, биринчи бетонни қуйиш (станциянинг ўзини қуриш) 2026 йил март ойида режалаштирилган. «Президент бизга муддатларни чапга эмас, ўнгга, яъни ўз муддатларимизни тезлаштиришга топшириқ берди», — деди.
