Ўзбекистон ва Япония «келажак авлодлар учун кенгайтирилган стратегик шериклик» ўрнатишга келишиб олдилар. Бу ҳақда 2025 йил 20 декабрь куни Токиода бўлиб ўтган музокаралар якунида Ўзбекистон президенти Шавкат Мирзиёев ва Япония бош вазири Санаэ Такаичининг қўшма баёнотида сўз боради.
Томонлар ушбу ҳужжат ҳамкорликни янги босқичга кўтаришига ва кўп қиррали алоқаларни кенгайтириш учун кенг уфуқлар очишига ишонч билдирдилар.
Ўзбекистон президентининг расмий ташрифи доирасида таълим, соғлиқни сақлаш, экология, сув ресурслари, транспорт, шаҳарсозлик, туризм, қишлоқ хўжалиги ва табиий офатлар хавфини камайтириш соҳаларида келишувлар пакети қабул қилинди.
Музокараларда нималар муҳокама қилинди
Музокараларда Ўзбекистон-Япония муносабатларини чуқурлаштириш масалалари кўриб чиқилди. Шавкат Мирзиёев дипломатик муносабатлар ўрнатилган 33 йил давомида Япония доимо яқин дўст ва Ўзбекистоннинг асосий технологик ҳамда инвестициявий ҳамкорларидан бири бўлиб келганини таъкидлади. У республиканинг замонавий саноат ва энергетика инфратузилмасини яратиш, кадрлар салоҳиятини ривожлантиришга салмоқли ҳисса қўшди, деди.
Япония бош вазири Шавкат Мирзиёевнинг 6 йил ичидаги илк ташрифини (у ушбу мамлакатга 2019 йил декабрида ташриф буюрган эди) муҳим воқеа деб атади ва Ўзбекистон-Япония алоқалари анъанавий равишда алоҳида ишонч ва ўзаро ҳурмат тамойиллари асосида қурилганини қайд этди.
Ўзбекистон президенти Япония билан шерикликни ривожлантиришнинг асосий йўналишлари сифатида «яшил» энергетика ва саноат декарбонизацияси, ахборот технологиялари, муҳим минерал ресурслар, машинасозликдаги кооперация, соғлиқни сақлаш ва туризм инфратузилмасини модернизация қилишни санаб ўтди.
Япония ҳукумати раҳбари уран каби минерал ресурсларга бой бўлган Ўзбекистон Япониянинг иқтисодий хавфсизлиги учун муҳим ҳамкор эканини таъкидлади. У Япония ҳукумати кўмагида ўтказилаётган геологик тадқиқотлар орқали ҳамкорлик мустаҳкамланишига умид билдирди.
Санаэ Такаичи Ўзбекистоннинг барқарор иқтисодий ўсишини қўллаб-қувватлаш доирасида Япония чорвачиликни ривожлантириш учун иенада кредитлар, тиббий асбоб-ускуналар сотиб олиш учун грантлар ҳамда микро, кичик ва ўрта корхоналарнинг молиявий ресурслардан фойдаланиш имкониятларини яхшилаш учун хусусий инвестицияларни молиялаштиришга қарор қилганини маълум қилди.
У, шунингдек, Япония Транскаспий халқаро транспорт йўналиши — «Ўрта коридор»ни ўз ичига олган ҳолда глобал таъминот занжирларини такомиллаштиришга ўз ҳиссасини қўшиш ниятида эканини билдирди.
Шавкат Мирзиёев жорий саммитга тайёргарлик доирасида қиймати 12 млрд доллардан ортиқ бўлган кооперация лойиҳалари портфели шакллантирилганини маълум қилди. Уларни илгари суриш учун қўшма инвестиция платформасини яратиш таклиф этилди.
Самарқанд вилоятида Япония модели ва стандартлари асосида махсус иқтисодий зона ташкил этиш бўйича келишувга эришилди. Япон ҳамкорлари билан биргаликда амалга оширилаётган «Бир қишлоқ — бир маҳсулот» дастурини кенгайтириш таклифи қўллаб-қувватланди. Кейинги йилда Самарқандда икки мамлакат ҳудудларининг биринчи форумини ўтказиш режалаштирилган.
Ўзбекистон ва Япония кўп йиллардан буён таълим ва кадрлар тайёрлаш соҳасида ҳамкорлик қилиб келмоқда. Тошкентда Ўзбекистон-Япония инсон ресурслари маркази фаолият юритмоқда. 2010 йилдан буён Ректорлар форуми ўтказиб келинмоқда. Тошкентда Цукуба университети билан ҳамкорликда Ўзбекистон-Япония университетини очиш режалаштирилган.
Дипломатик муносабатлар ўрнатилганининг 35 йиллиги муносабати билан 2027 йилда ўзаро маданият йиллари ўтказилади.