Ўзбекистон президенти Шавкат Мирзиёев ва Россия президенти Владимир Путин 2026 йил 24 март куни телефон орқали мулоқот қилдилар, деб хабар берди давлат раҳбари матбуот хизмати.
Ўзбекистон-Россия стратегик шериклик ва иттифоқчилик муносабатларини ривожлантириш масалалари кўриб чиқилди.
Савдо-иқтисодий ҳамкорликнинг ривожланиши қайд этилди — 2025 йил якунларига кўра товар айирбошлаш ҳажми 10 фоизга ўсиб, 13 млрд долларга етган бўлса, жорий йил бошидан буён яна 32 фоизга ошди.
Саноат, энергетика, транспорт ва иқтисодиётнинг бошқа тармоқларида йирик ҳамкорлик лойиҳаларини амалга ошириш давом эттирилмоқда.
«Ўзбекистонда илк атом электр станциясини қуриш лойиҳасини илгари суришга алоҳида эътибор қаратилди», — дейилади хабарда.
Аввалроқ хабар берилгандек, «Ўзатом» ва «Росатом» 24 март куни ҳамкорлик бўйича «йўл харитаси» ва АЭС қурилиши шартномасига қўшимча келишув имзоладилар. Лойиҳа янги конфигурацияда — йирик ва кичик энергоблокларнинг уйғунлигида амалга оширилади. Жиззах вилоятидаги майдончада бетонлаш ишлари бошлаб юборилган.
Томонлар, шунингдек, иқтисодий ҳамкорлик бўйича ҳукуматлараро қўшма комиссия ишининг самарадорлигини юқори баҳоладилар.
Ўзбекистон ва Россия апрель ойида Тошкентда ўтказиладиган навбатдаги «Иннопром. Марказий Осиё» халқаро саноат кўргазмасига фаол тайёргарлик кўраётгани таъкидланди.
«Халқаро кун тартибидаги долзарб масалалар, жумладан, Яқин Шарқ, Жанубий Осиё ва Украинадаги вазият юзасидан фикр алмашилди», — дейилади хабарда.
Шунингдек, бўлажак тадбирлар жадвали муҳокама қилинди.