Ўзбекистоннинг Киевдаги элчихонаси Украина халқини Украина Мустақиллик куни билан табриклади. Табрик дипломатик ваколатхонанинг Facebook саҳифасида эълон қилинди.
«Ушбу унутилмас кун Украинанинг эркинлик, суверенитет ва бирдамликка интилишини, шунингдек, украин халқининг тинчлик, барқарорлик ва фаровонликка бўлган руҳий кучи, матонати ва тинимсиз интилишини акс эттиради», — дейилади хабарда.
Табрикда Украина давлати ва унинг фуқароларига тинчлик, тотувлик, фаровонлик ва бундан кейинги муваффақиятли тараққиёт тилаб қолинган.
Қозоғистон президенти Украина президенти Владимир Зеленскийга табрик телеграммаси юборди. У украин халқига тинчлик ва фаровонлик тилади.
Озарбайжон президенти Илҳом Алиев ҳам Владимир Зеленскийни табриклаб, икки давлат «ҳудудий яхлитлик ва суверенитет масалаларида халқаро ҳуқуқ нормалари ва тамойилларига мувофиқ ўзаро қўллаб-қувватлаш ва бирдамлик кўрсатаётганини» таъкидлади. «Озарбайжон Украинанинг дўст халқига зарур гуманитар ёрдам ва кўмакни кўрсатишда давом этади», — дейилади табрикда.
2024 йили ҳам Ўзбекистон элчихонаси Украинани ушбу байрам билан табриклаган эди. 2022 йилда эса элчихона ўз сайтида президент Шавкат Мирзиёевнинг Владимир Зеленский номига йўллаган табригини эълон қилганди.
