Ўзбекистон ва Украина савдо-иқтисодий ҳамкорлик бўйича ҳукуматлараро комиссия ишини қайта тиклашга тайёргарлик кўришни бошлади. Бу ҳақда Украина ташқи ишлар вазири ўринбосари Александр Мишенко Тошкентга ташрифи якунлари бўйича маълум қилди.
Унинг сўзларига кўра, томонлар аллақачон кун тартибини шакллантиришга киришган ва йил давомида йиғилиш ўтказишга умид қилмоқдалар.
«Биз ўн йиллаб йиғилмаган ҳукуматлараро комиссия ишини қайта тиклаш учун шароит яратиш устида ишлаяпмиз. […] Тахминимизча, пойдевор тайёрлаш учун 7-8 ой кифоя қилади. Агар муҳокама қилиш мумкин бўлган кун тартиби мавжудлиги бўйича келишувга эришсак, иқтисодиёт вазирлари даражасида йиғилиш ўтказамиз», — деди Александр Мишенко.
«Ўйлайманки, биз сиз билан тахминан 3-4 ойдан кейин аниқроқ гаплаша оламиз», — дея қўшимча қилди.
Украина делегацияси Тошкентда Инвестициялар, саноат ва савдо вазирлигида ҳам учрашув ўтказди ва унда иш йўналишлари — фармацевтика, агросаноат мажмуаси ва бошқалар муҳокама қилинди.
Украина томони, ўз вакилининг сўзларига кўра, аллақачон ишбилармон доиралар иштирокида ишни бошлаган.
«Мен Украина иш берувчилар федерацияси олиб келган бизнес делегацияси билан деярли бир вақтда келдим, улар менинг ташрифимдан олдин бу ерда бир нечта учрашувлар ўтказишди. Фармакология, агросаноат, машинасозлик ва автомобилсозлик масалаларини муҳокама қилишди. Масалан, сизда жуда қизиқарли бўлган, шасси ишлаб чиқарадиган MAN заводи бор, биз буни ўрганяпмиз», — деб таъкидлади Александр Мишенко.
Шу билан бирга, томонлар кенгроқ иқтисодий кун тартибини, жумладан, Ўзбекистон компанияларининг урушдан кейин Украинани тиклашдаги иштирокини кўриб чиқмоқдалар.
«Ковид ва кенг кўламли уруш, албатта, иқтисодий фаолликка ўз таъсирини ўтказмай қолмади. Украина урушнинг дастлабки йилларида барча ресурсларини тўплаб, жуда оғир шароитда шунчаки яшаб қолиш учун курашди. Урушнинг дастлабки йилларида ҳамкорларимиз бизга ўзларига керак бўлмаган нарсаларни беришарди ва бу жуда қийин эди. Ҳозир фронтдаги вазият мутлақо бошқача, чунки ҳозир бизга ўзимизга керак бўлган нарсаларни беришмоқда. Ва бу сифат жиҳатидан янги ўзгариш. Украина армияси душман ҳужумларини жуда самарали қайтариш имконини берувчи қуролларга эга бўлди. Энди армия чегараларни жуда аниқ ҳимоя қилаётган ушбу нисбатан барқарор вазиятда биз муваффақиятлироқ музокаралар сиёсатини олиб бормоқдамиз. Ва урушдан кейин Украинанинг ривожланиши ҳақида ўйлаш вақти келди», — дея тушунтирди Александр Мишенко.
Украина делегацияси, хусусан, Ўзбекистон вакилларини 2026 йил июнь ойида Польшанинг Гданьск шаҳрида бўлиб ўтадиган Украинани тиклаш бўйича халқаро конференцияда иштирок этишга таклиф қилди.
«У ерда Ўзбекистон манфаатлари — қурилиш, қайта ишлаш, консалтинг ва бошқа ҳар қандай компаниялар манфаатлари ифодаланиши мумкин… чунки Украинада адолатли тинчлик ўрнатилганидан кейин катта қурилиш буми бошланади, барча тармоқлар тикланади, сизда эса кўплаб соҳаларда, жумладан, қурилиш соҳасида бой тажриба тўпланган», — деди ташқи ишлар вазири ўринбосари.
Эслатиб ўтамиз, Ўзбекистон ва Украина ҳукуматлараро комиссиясининг сўнгги йиғилиши 2007 йилда бўлиб ўтган эди. 2021 йил май ойида Тошкентда икки мамлакат ТИВларининг 10 йилдан ортиқ вақт ичида илк бор сиёсий маслаҳатлашувлари ўтказилгандан сўнг, томонлар ҳукуматлараро комиссиянинг янги йиғилишини режалаштиришни бошлаган эдилар, бироқ Россиянинг Украинага кенг кўламли босқини бошланиши билан алоқалар фаоллиги пасайган эди.