Ўзбекистон мудофаа вазири Шуҳрат Холмуҳамедов ва Туркия миллий мудофаа вазири Яшар Гюлер Анқарада 2026 йил учун ҳарбий ҳамкорлик тўғрисидаги битимни имзоладилар, деб хабар берди вазирлик матбуот хизмати.
Вазирларнинг учрашувлари ҳам тор доирада, ҳам делегациялар таркибида бўлиб ўтди. Уларда минтақавий хавфсизлик, мудофаа саноати, ҳарбий тайёргарлик ва икки давлат армиялари ўртасидаги ҳаракатларни мувофиқлаштириш масалалари муҳокама қилинди.
2026 йилга мўлжалланган ҳарбий ҳамкорлик режасига ҳарбий бўлинмаларнинг қўшма ўқув машғулотлари ва тажриба алмашиш тадбирлари киритилган.
Ҳарбий тиббиёт соҳасидаги келишувлар икки мамлакат ҳарбий шифокорларининг малакасини ошириш, ҳарбий госпиталларни бошқариш ва ҳарбий-тиббий технологияларни ўрганиш, тажриба алмашиш ҳамда тренинглар ўтказишни назарда тутади.
Шуҳрат Холмуҳамедов Туркия тажрибаси Ўзбекистон армиясини модернизация қилиш ва унинг салоҳиятини мустаҳкамлашга ёрдам беришини таъкидлади, Яшар Гюлер эса Ўзбекистон билан муносабатлар стратегик шериклик даражасига чиқаётганини қайд этди.