Ўзбекистон, Қирғизистон ва Тожикистон ташқи ишлар вазирлари 2025 йил 15 ноябрь куни Тошкентда уч давлат ўртасидаги давлат чегараларининг туташган нуқтаси тўғрисидаги шартномани ратификация қилиш ёрлиқларини алмашиш тўғрисидаги Протоколни имзолади.
Имзолаш маросими минтақа давлат раҳбарларининг еттинчи Маслаҳат учрашуви арафасида Марказий Осиё мамлакатлари ташқи ишлар вазирлари йиғилиши доирасида бўлиб ўтди.
Шартноманинг ратификация қилиниши кўп йиллик ишлар, конструктив мулоқот ва мамлакатлар ўртасидаги ўзаро ишончнинг натижаси бўлди, дейилади Ўзбекистон Ташқи ишлар вазирлиги хабарида. Вазирлик бу қадам «дипломатия, ҳамкорларга ҳурмат ва узоқни кўра билиш орқали ўткир масалаларни ҳал қилиш учун жамоавий қобилиятни намойиш этишини» таъкидлайди.
Ўзбекистон ташқи ишлар вазири Бахтиёр Саидов ўзининг Telegram-каналида ратификация жараёнининг якунланиши чегаралар туташган нуқтаси тўғрисидаги келишувларни амалга ошириш учун йўл очишини таъкидлади. Бу яхши қўшничилик муносабатларининг ҳуқуқий асосини мустаҳкамлаши ва иқтисодий ҳамкорликни, чегара олди савдосини кенгайтиришни ва қўшма инфратузилма лойиҳаларини амалга оширишни рағбатлантириши кутилмоқда.
Уч давлат президентлари 2025 йил 31 март куни Хўжандда чегаралар туташган нуқтаси тўғрисидаги шартномани имзоладилар ва чегаралар туташган ҳудудда Дўстлик стеласини тантанали равишда очдилар.
Шартномани ратификация қилиш тўғрисидаги қонун Ўзбекистон Олий Мажлиси Қонунчилик палатаси томонидан 2025 йил 28 октябрда қабул қилинган, 1 ноябрда Сенат томонидан маъқулланган ва 14 ноябрда президент Шавкат Мирзиёев томонидан имзоланган эди.
