Ўзбекистон Президенти Шавкат Мирзиёев ва Тожикистон Президенти Эмомали Раҳмон 2026 йил 26 март куни Тошкентда Олий давлатлараро кенгашнинг биринчи йиғилишини ўтказдилар, деб хабар берди давлат раҳбари матбуот хизмати.
«Шубҳасиз, ушбу формат икки томонлама ҳамкорликни сифат жиҳатидан янги босқичга олиб чиқади ҳамда Ўзбекистон-Тожикистон стратегик шериклик ва иттифоқчилик муносабатларини амалий мазмун ва истиқболли ташаббуслар билан бойитишга хизмат қилади», — деди Шавкат Мирзиёев.
Ташриф арафасида ҳукуматлараро комиссия йиғилиши, саноат кўргазмаси, ҳудудлар, ректорлар, олимлар, ёшлар ва таҳлилий марказлар форумлари бўлиб ўтди. Шу кунларда Ўзбекистонда Тожикистон маданияти ва киноси кунлари ўтмоқда.
Томонлар ҳамкорликнинг янги йўналишларини муҳокама қилдилар, мавжуд салоҳиятдан фойдаланиш имкониятларини таҳлил қилдилар ҳамда ўзаро товар айирбошлаш ҳажмини ошириш, саноат кооперацияси ўсишини рағбатлантириш, транспорт боғлиқлигини кучайтириш ва сув-энергетика хавфсизлигини мустаҳкамлаш бўйича қарорлар қабул қилдилар.
2025 йил якунларига кўра товар айирбошлаш ҳажми қарийб 1 млрд долларга етди. Президентлар ўзаро савдони 2030 йилгача 2 млрд долларга етказиш имкониятларини кўриб чиқдилар. Бунинг учун томонлар «Ойбек — Фотеҳобод» чегараолди савдо марказини ташкил этишни тезлаштириш, товарларни сертификатлашнинг рақамли тизимларини ва E-Permit рухсатномалар алмашинувини жорий этиш ҳамда чегара ўтказиш пунктларини модернизация қилишга келишиб олдилар.
Бундан ташқари, тоғ-кон, энергетика, қишлоқ хўжалиги, электротехника, енгил саноат, қурилиш ва бошқа соҳалардаги лойиҳаларни ўз ичига олган алоҳида саноат кооперацияси дастури қабул қилинмоқда.
Етакчилар истиқболли лойиҳаларни қўллаб-қувватлаш учун қўшма инвестиция компаниясининг капитал базасини кенгайтириш муҳимлигини қайд этдилар. Шунингдек, бугун икки мамлакат ҳудудида янги қўшма лойиҳаларга старт берилади.
Президентлар энергетика, сув хўжалиги, транспорт ва бошқа кўплаб соҳалардаги ҳамкорлик истиқболларини кўриб чиқдилар.
Давлат раҳбарлари, шунингдек, ҳудудлараро алоқаларга қўшимча суръат бағишлаш, гуманитар, таълим ва илмий алмашинувларни рағбатлантиришга келишиб олдилар. Йирик диаспоралар мавжудлигини ҳисобга олган ҳолда, томонлар маданий-гуманитар алоқаларни мустаҳкамлаш бўйича 5 йиллик чора-тадбирлар режасини қабул қилиш ниятидалар.
Етакчилар халқаро кун тартибини ҳам муҳокама қилдилар. Улар Марказий Осиёдаги кўп томонлама тузилмалар ва минтақавий форматлар доирасида мулоқотни ва ўзаро қўллаб-қувватлашни давом эттириш муҳимлигини таъкидладилар. Давлат раҳбарлари хавфсизлик соҳасидаги ҳамкорликни фаоллаштиришга ҳам келишиб олдилар.