Ўзбекистон очиқлик сиёсатидан ҳеч қачон воз кечмайди, деди Президент Шавкат Мирзиёев 2025 йил 26 декабрь куни парламент ва халққа йўллаган йиллик Мурожаатномасида.
«Яна бир бор очиқ айтмоқчиман. Буни ҳамма — ўнг қулоғи билан ҳам, чап қулоғи билан ҳам эшитиб олсин. Кенг кўламли янгиланишлар даврида, Янги Ўзбекистон даврида биз очиқлик сиёсатидан ҳеч қачон ортга қайтмаймиз», — деди.
«Сўз ва матбуот эркинлигини таъминлаш бизнинг устувор вазифамиз бўлиб қолган ва шундай бўлиб қолади. Буни ҳамма билиши керак», — дея таъкидлади давлат раҳбари.
Президент ислоҳотлар самарадорлигини таъминлашда фуқаролик жамияти институтлари ролининг муҳимлигини таъкидлади.
Шу боис уларни қўллаб-қувватлаш сиёсати изчил давом эттирилади. Хусусан, фуқаролик жамиятини ривожлантиришнинг беш йиллик стратегияси ишлаб чиқилади.
Фуқаролик жамияти институтларига ижтимоий буюртмалар бериш тизими рақамлаштирилади, молиялаштириш ҳажми эса 2 бараварга оширилади, деди Шавкат Мирзиёев.
Бундан ташқари, хайрия ташкилотларини ташкил этиш тартибини соддалаштириш ҳамда улар фаолиятининг ҳисобдорлиги ва шаффофлиги механизмларини такомиллаштириш режалаштирилмоқда.
2023 йил февраль ойида Президент ҳар куни янгиликларни ўқиш учун вақт ажратишини айтган эди. У ОАВ эркинлиги шароитида ишлаш қийинроқ эканини, аммо тўғри танқид фойда келтиришини қайд этганди. Ўша йилнинг май ойида Шавкат Мирзиёев ОАВни «халқ овози ва фикрини кенг жамоатчиликка ҳамда давлат органларига етказадиган энг таъсирчан куч» деб атаган эди.
