Ўзбекистон футбол бўйича миллий терма жамоаси ўз тарихида илк бор 2026 йил АҚШ, Канада ва Мексикада бўлиб ўтадиган жаҳон чемпионатининг финал босқичига чиқди.
ЖЧ саралаш учинчи босқичида миллий жамоа БАА меҳмони бўлиб, дуранг ўйнади. 2025 йил 5 июнь куни Абу-Дабидаги «Ал-Наҳён» стадионида бўлиб ўтган учрашув 0:0 ҳисобида якунланди.
Бош мураббий Тимур Кападзе шогирдларига тарихдаги илк жаҳон чемпионати йўлланмасини муддатидан олдин қўлга киритиш учун БААга ютқазмаслик кифоя эди.
Учрашув бошиданоқ ўзбекистонликлар футболчини йўқотиш билан тўқнашди. 13-дақиқада ҳужумчи Остон Ўрунов жароҳат олиб, ўйинни давом эттира олмади. Унинг ўрнига Аббосбек Файзуллаев тушди.
Миллий жамоа биринчи ҳақиқий голли вазиятни 53-дақиқада яратди, Файзуллаев тўпни бош билан зарба берганида, у дарвоза устунига тегди.
Дарвозабон Ўткир Юсупов ўйиннинг энг яхши футболчиси бўлди. У бир неча бор терма жамоани голлардан қутқариб қолди, жумладан, учрашувнинг сўнгги дақиқасида муҳим сейвни амалга оширди.
Ўзбекистон учун бу жаҳон чемпионатига тарихий биринчи йўлланма — 1991 йилда мустақилликка эришгандан ва 1994 йилда Осиё Футбол Конфедерациясига аъзо бўлгандан бери мамлакат саралашдан ўтиш учун 8 марта уринган эди.
Ўзбекистон Марказий Осиёдан жаҳон чемпионатига чиққан биринчи жамоа ҳам бўлди.
Мураббий Тимур Кападзе ҳам тарихга кирди, у ёшлар терма жамоасини Олимпия ўйинларига, миллий терма жамоани эса ЖЧга олиб чиққан биринчи мураббий бўлди.
«А» гуруҳидаги 9 та ўйиндан сўнг Ўзбекистон 18 очко билан иккинчи ўринда бормоқда. Эрон пешқадамлик қилмоқда, у ҳам мундиалга муддатидан олдин саралашдан ўтди. БАА жамоаси 14 очкога эга. Кейинги ўринларда Қатар (10), Қирғизистон (6) ва КХДР (2) бор, уларнинг захирасида битта ўйин бор.
Саралаш турнирининг навбатдаги, сўнгги учрашувини Ўзбекистон Қатарга қарши 10 июнь куни Тошкентда ўтказади.
Эслатиб ўтамиз, 18 та жамоа 6 та жамоадан иборат учта гуруҳга бўлинган. Гуруҳдан 2 та энг яхши жамоа ЖЧ-2026 финал босқичига тўғридан-тўғри чиқади. Учинчи ва тўртинчи ўринларни эгаллаган жамоалар тўртинчи босқичда ўйнайдилар, у ерда яна 2 та тўғридан-тўғри йўлланма, шунингдек, қитъалараро плей-оффда ўрин учун курашадилар.
Ўзбекистон терма жамоаси расман 2026 йил АҚШ, Канада ва Мексикада бўлиб ўтадиган футбол бўйича жаҳон чемпионати финал босқичининг саккизинчи иштирокчисига айланди. Ҳозирги вақтда мундиалда ўйнаш ҳуқуқини Канада, Мексика, АҚШ, Япония, Янги Зеландия, Эрон ва Аргентина ҳам қўлга киритган.
