Ўзбекистон илк бор Халқаро футбол федерацияси (ФИФА) шафелигида ҳар икки йилда бир марта ўтказиладиган FIFA Series халқаро футбол турнирига мезбонлик қиладиган давлатга айланади. Бу ҳақда Ўзбекистон футбол ассоциацияси (ЎФА) хабар берди.
FIFA Series 2026 турнирнинг иккинчи мавсуми бўлиб, у турли қитъа конфедерацияларига мансуб миллий терма жамоалар ўзаро ўртоқлик учрашувлари ўтказадиган таклиф этилувчи футбол мусобақаси. 2026 йилги мавсумда 4 та жамоадан иборат 9 та алоҳида серия ўтказилиши режалаштирилган бўлиб, улар ФИФАнинг баҳорги ойнаси даврида 8 та мезбон мамлакатда бўлиб ўтади.
Ўзбекистон Габон, Тринидад ва Тобаго ҳамда Венесуэла миллий терма жамоаларини қабул қилади. Турнир март ва апрель ойларига мўлжалланган. Ўртоқлик учрашувлари аёллар терма жамоалари ўртасида ҳам ўтказилади.
ФИФА маълумотларига кўра, бу йил 6 та конфедерациядан 48 та миллий терма жамоа иштирок этади, бу федерациянинг 211 та аъзо ассоциациясидан иборат жаҳон футбол ҳамжамиятининг қарийб тўртдан бир қисмини ташкил этади. Улар 12 та гуруҳда (9 нафар эркаклар ва 3 нафар аёллар) 4 тадан жамоа бўлиб ўйнайдилар.
FIFA Series турнири шунингдек Австралия, Озарбайжон, Индонезия, Қозоғистон, Маврикий, Пуэрто-Рико ва Руандада ҳам бўлиб ўтади. Қозоғистон Комор ороллари, Қувайт ва Намибия терма жамоаларини қабул қилади. Аёллар терма жамоалари ўртасидаги ўйинлар Бразилия, Кот-д’Ивуар ва Таиландда ўтказилади.
FIFA Series турнирининг синов босқичи 2024 йилнинг мартида бўлиб ўтган эди.