Ўзбекистон Президенти Шавкат Мирзиёев мамлакатнинг максимал энергетика мустақиллигини таъминлаш бўйича топшириқлар берди. Бу ҳақда Президент администрацияси нефть-газ соҳасида ислоҳотларни жадаллаштириш бўйича лойиҳа офиси сектор мудири Беҳзот Нарматов маълум қилди.
2026 йил 10 март куни давлат раҳбарига нефть-газ тармоғида белгиланган вазифалар ижроси юзасидан ҳисобот берилди.
Нарматовнинг қайд этишича, йил бошидан буён «Ўзбекнефтгаз» иккита янги кон очган ва қазиб олишни кенгайтириш учун қатор шартномалар имзолаган. «Шартномалар имзоланди, шунингдек, Хитойнинг XIBU компанияси билан йил давомида 30 та чуқур ва ўта чуқур қудуқларни бурғилаш бўйича келишувга эришилди», — деди у «Ўзбекистон 24» телеканалига берган интервьюсида.
Бундан ташқари, компания президентга йил якунига қадар режалаштирилган ишлар ва уларни ўз вақтида амалга ошириш чора-тадбирлари тўғрисида ҳисобот тақдим этган. Унинг сўзларига кўра, 2026 йилда сейсморазведка ишлари ҳажми сезиларли даражада оширилади. «Бу йил учун режалаштирилган сейсморазведка ишлари ҳажми 6500 дан 9700 погон километргача оширилмоқда ва бунинг учун нефть-газ тармоғи томонидан барча зарур шартномалар тузилиб, тегишли шароитлар яратилган», — деди.
Шунингдек, йиғилишда соҳада фаолият юритаётган хусусий ва хорижий компаниялар фаолияти ҳам муҳокама қилинди. «Ўзбекистон ҳудудида ишлайдиган ва ҳозирда захираларимизнинг қарийб 25 фоизини бошқараётган хусусий ва хорижий компаниялар ҳақида маълумот берилди. Бизга уларнинг фаолиятини кўриб чиқиш ва самарадорлигини ошириш бўйича топшириқлар берилди», — деди Нарматов.
Унинг айтишича, президент мамлакатнинг бутун энергетика тизими самарадорлигини қайта кўриб чиқишни буюрган. «Президент Республикада газдан фойдаланиш самарадорлигини ва умуман бутун энергетика тизимини қайтадан кўриб чиқиш зарурлигини таъкидлади, шунингдек, Ўзбекистоннинг максимал энергетика мустақиллигини таъминлаш бўйича топшириқлар берди», — деди.
Иқтисодиёт ва молия вазирининг нефть ва газ масалалари бўйича ўринбосари Хуршид Мустафоевнинг маълум қилишича, президентга «Ўзбекнефтгаз» ва газ қазиб олувчи корхоналарнинг молиявий ҳолати ҳамда ишлаб чиқариш кўрсаткичлари ҳақида тақдимот ўтказилган.
Мустафоевнинг сўзларига кўра, йиғилишда газ қазиб олиш, нефть маҳсулотлари ишлаб чиқариш ва корхоналарнинг молиявий кўрсаткичлари таҳлил қилинган. «Табиий газ қазиб олиш ҳажмини янада ошириш, нефть маҳсулотлари ишлаб чиқаришни кўпайтириш, маҳсулот таннархини пасайтириш, дебиторлик ва кредиторлик қарздорлигини камайтириш, корхоналар даромадини ошириш, шунингдек, трансформация жараёнларини жадаллаштириш бўйича аниқ вазифалар белгиланди», — деди Мустафоев.
2021 йил август ойида президент ҳузуридаги йиғилишда намойиш этилган кадрларга кўра, «Ўзбекнефтгаз» ихтиёрида жорий захираларнинг 50 фоизи ёки 934,1 млрд кубометр газга эга 111 та кон бўлган. Ўша пайтда «Лукойл» компанияси 413,1 млрд кубометр (22,1%), Uz-Kor Gas Chemical — 109,6 млрд (5,9%), Surhan Gas Chemical — 106,6 млрд (5,8%), Jizzakh Petroleum (ҳозирги Sanoat Energetika Guruhi, SEG) — 84,9 млрд кубометр (4,5%) газ захираларига эга конларда ишлаётган эди.
Ўшандан бери мамлакатда газ қазиб олиш ҳажми камайиб бормоқда. Агар 2021 йилда ишлаб чиқариш 53,8 млрд кубометрни ташкил этган бўлса, 2025 йил якунларига кўра — 42,3 млрд кубометр бўлди, бу эса 21,3 фоизга кам демакдир (-11,5 млрд).
«Ўзбекнефтгаз» компанияси ўтган йил якунлари бўйича 25,2 млрд кубометр газ ишлаб чиқарди, бу прогнозлардан паст. 2026–2027 йилларда қазиб олиш ҳажмининг барқарорлигини таъминлаш, шунингдек, газ захираларини кўпайтириш ва уни қайта ишлаш кўзда тутилган.