Бокс бўйича Ўзбекистон терма жамоаси 2025 йил 14−20 ноябрь кунлари Ҳиндистонда бўлиб ўтган Жаҳон кубогида 13 та медални қўлга киритди, дея хабар берди Бокс федерацияси.
Турнирда 18 мамлакатдан 130 дан ортиқ боксчи иштирок этди ва у World Boxing бошчилигида ўтказилди.
Ўзбекистон шарафини 15 нафар спортчи — 9 нафар эркак ва 6 нафар аёл ҳимоя қилди. Мусобақа якунларига кўра, жамоа 4 та олтин, 5 та кумуш ва 4 та бронза медални қўлга киритди.
Олтин:
- Асилбек Жалилов (50 кг);
- Самандар Олимов (55 кг);
- Жавоҳир Абдураҳимов (75 кг);
- Ҳалимжон Мамасолиев (90 кг дан юқори).
Кумуш:
- Жасурбек Йўлдошев (85 кг);
- Нусратбек Тоҳиров (90 кг);
- Фарзона Фозилова (48 кг);
- Азиза Зокирова (70 кг);
- Олтиной Сотимбоева (81 кг дан юқори).
Бронза:
- Дилшод Абдумуродов (60 кг);
- Адҳам Муҳиддинов (65 кг);
- Муҳаммадазизбек Исмоилов (70 кг);
- Гулсевар Ғаниева (51 кг).
World Boxing кубогининг медаллар жадвалида 9 та олтин, 6 та кумуш ва 5 та бронза медалини қўлга киритган Ҳиндистон терма жамоаси етакчилик қилди. Кейинги ўринда 9 та финал жангида 4 та олтин медални қўлга киритган Ўзбекистон эгаллади.
«Эркаклар, одатдагидек, ўз тоифаларида биринчиликни бой беришмади. Қизлар ҳам муносиб иштирок этдилар. Баъзи финал жанглари ҳакамларнинг тушунарсиз қарорлари туфайли рақибаларга берилди — Олтиной Сотимбоева ва Гулсевар Ғаниева иштирокидаги жанглар бунга ёрқин мисол. Боксда бундай ҳолатлар ҳам учрайди. Шунга қарамай, бу босқич қизларимиз учун муҳим машғулот майдони бўлди», — дейилади Ўзбекистон бокс федерацияси баёнотида.
Қайд этиш жоизки, Гулсевар Ғаниева ярим финалда ҳиндистонлик рақибасига 0:5 ҳисобида ютқазган, Олтиной Сотимбоева эса финалда Ҳиндистондан Нупур Нупурга 2:3 ҳисобида мағлуб бўлган.
Бокс бўйича Жаҳон кубоги тўрт босқичда бўлиб ўтди. Биринчиси 31 мартдан 5 апрелгача Бразилиянинг Фос-ду-Игуасу шаҳрида бўлиб ўтди, унда ўзбекистонликлар 5 та олтин, 2 та кумуш ва 1 та бронза медални қўлга киритди. Меҳмон мамлакат терма жамоаси атиги 3 та олтин мукофотни қўлга кирита олди.
2025 йил 10 майдан 17 майгача Польшанинг Варшава шаҳрида бўлиб ўтган иккинчи босқичда терма жамоа 6 та олтин, 1 та кумуш ва 2 та бронза медали билан мусобақа пешқадамига айланди.
2025 йил 28 июндан 7 июлгача Остонада бўлиб ўтган учинчи босқичда эркаклар терма жамоаси Ливерпулдаги жаҳон чемпионатига тайёргарлик туфайли иштирок этмади. Аёллар жамоаси кенгайтирилган таркибда 1 та олтин ва 4 та бронза медални қўлга киритди.
Жаҳон кубоги босқичлари спортчиларга Олимпия ўйинларида иштирок этиш учун рейтинг очколарини олиб келади.
