Миллий статистика қўмитасининг ташқи савдо айланмаси бўйича ҳисоботи Ўзбекистон тўрт ойдан бери олтин сотмаётганини кўрсатмоқда.
Идора маълумотларига кўра, 2026 йил январь ойида экспорт 1,69 млрд долларни ташкил этган, бу 2025 йилнинг шу даврига нисбатан 26,7 фоизга кўп. Барча етказиб беришларнинг қарийб ярми хизматлар ҳиссасига тўғри келди — 742,1 млн доллар. Кейинги ўринлардан саноат товарлари (306,7 млн доллар) ва кимё маҳсулотлари (169 млн доллар) жой олди.
Импорт ҳажми 4,14 млрд долларга етди, бу 2025 йилнинг январь ойига нисбатан 30,3 фоизга кўп. Олтин экспорти тўхтатилгани фонида савдо балансининг манфий сальдоси (экспорт ва импорт ўртасидаги фарқ) 32,9 фоизга ошиб, бир йил аввалги 1,84 млрд доллардан 2,44 млрд долларгача етди.
2026 йилнинг январь ойида жаҳон бозорида нархлар юқори бўлишига қарамай, мамлакат олтин сотмади. Шундай қилиб, Республика кетма-кет тўртинчи ой қимматбаҳо металл сотувини амалга оширмаяпти.
Ўзбекистон охирги марта 2025 йилнинг сентябрь ойида олтин экспорт қилган эди — ўшанда етказиб бериш ҳажми 1,48 млрд долларни ташкил этган. Ўшандан бери қимматбаҳо металнинг жаҳон котировкалари бир троя унцияси учун 3806,5 доллардан бир неча кун олдинги 5400 долларгача (+41,8%) кўтарилди, шундан сўнг нархлар 5200 доллардан пастга тушди.
Эслатиб ўтамиз, 2025 йил якунларига кўра олтин экспорти рекорд даражадаги 9,9 млрд долларга етган эди. Шу билан бирга, Марказий банкнинг халқаро захиралари кетма-кет олти ойдан бери тарихий максимални янгилаб, аллақачон 75 млрд доллардан ошиб кетди. Фақат январь ойининг ўзида захиралар 8,77 млрд долларга (+13,2%), 2025 йил бошидан буён эса 82 фоиздан кўпроққа ўсди.
Ўсишнинг асосий омили регулятор захираларидаги олтиннинг қимматлаши бўлди. Унинг қиймати бир ой ичида 9,88 млрд долларга (+17,9%) ошиб, 64,97 млрд долларга етди.
Олтиннинг физик ҳажми кетма-кет тўртинчи ой ошмоқда, яъни Ўзбекистон Марказий банки мунтазам равишда олтин сотиб олмоқда. Январь ойида у 280 минг троя унциясига (8,7 тонна) кўпайиб, 12,83 млн унцияни (399 тонна) ташкил этди. Бу 2013 йилдан бери статистика юритила бошлаган даврдаги энг юқори кўрсаткич (бундан олдинги рекорд 2022 йил 1 декабрда қайд этилган эди — 12,82 млн унция).
Қайд этиш жоизки, Ўзбекистон Марказий банки мамлакатда Навоий ва Олмалиқ кон-металлургия комбинатлари (НКМК ва ОКМК) томонидан қазиб олинадиган олтинни сотиб олишда устувор ҳуқуққа эга ва кейинчалик бозор конъюнктурасидан келиб чиқиб, қимматбаҳо метални жаҳон бозорида сотади. Регулятор олтинни маҳаллий валютага сотиб олади, сўнгра ўз интервенциясининг ўзбек сўмига таъсирини қоплаш учун маҳаллий бозорда доллар сотади.