Ўзбекистон 2025 йил апрель ойи якунларига кўра дунёда олтин сотиш бўйича етакчиликни сақлаб қолди. Бу ҳақда Жаҳон олтин кенгашининг (World Gold Council) ойлик шарҳида айтилган.
2025 йил апрель ойида жаҳон марказий банклари жами 12 тонна олтин сотиб олди, бу март ойидагидан 12% кам ва охирги 12 ойдаги ўртача кўрсаткичдан (28 тонна) сезиларли даражада паст. Харид ҳажмининг пасайиши кетма-кет иккинчи ой кузатилмоқда.
Таҳлилчиларнинг фикрича, йил бошида олтин нархининг рекорд даражада ошиши талабнинг қисқаришига таъсир қилган бўлиши мумкин. WGC ёзишича, гарчи марказий банклар асосан стратегик қарорлар қабул қилса-да, активнинг қимматлашиши харидлар интенсивлигини вақтинча камайтирган бўлиши мумкин.
Харид ҳажми бўйича Польша Миллий банки етакчилик қилди, у ўз захираларини 12 тоннага ошириб, 509 тоннага етказди. Бу Европа Марказий банкидан (507 тонна) кўпроқ. 2025 йил бошидан буён Польша 61 тонна олтин сотиб олди.
Йирик харидларни Чехия Миллий банки (+3 тонна), Хитой Халқ банки (+2 тонна), Туркия Марказий банки (+2 тонна), Қирғизистон Миллий банки (+2 тонна), Қозоғистон Миллий банки (+1 тонна) ва Иордания Марказий банки (+1 тонна) ҳам амалга оширди.
Шу фонда Ўзбекистон Марказий банки ўз олтин-валюта захираларини сотишни давом эттирмоқда. 2025 йил апрель ойида мамлакат ҳажмини яна 11 тоннага қисқартирди. Учинчи ойдирки, мамлакат қимматбаҳо металл савдоси ҳажми бўйича биринчи ўринни эгалламоқда. Йил бошидан буён захиралар жами 26 тоннага, яъни 356 тоннага қисқарди.
Ўзбекистон 2025 йилда энг йирик олтин сотувчиси бўлиб қолмоқда.
2025 йил 1 май ҳолатига кўра, мамлакатнинг олтин-валюта захиралари ҳажми рекорд даражадаги 49,25 миллиард долларни ташкил этди, бу 15 ойлик импортга тенг. Хорижий валютадаги захиралар 11 миллиард доллардан ошди.
Марказий банк ўз активларини диверсификация қилиш учун 500,8 миллион долларлик қимматли қоғозларни сотиб олди.
Олтиннинг физик ҳажми 11,2 тоннага, йил бошидан буён эса 26 тоннага қисқарди. Шунга қарамай, қимматбаҳо металлнинг нархи ошгани сабабли олтин захирасининг қиймати 37,65 миллиард долларгача ўсди.
S&P баҳосига кўра, Марказий банкнинг мавжуд захиралари ҳажми 2026 йилгача 36,3 миллиард долларга, 2028 йилгача эса 30,07 миллиард долларгача камаяди. Бу, жумладан, олтиннинг нархи пасайиши кутилаётган фондаги қайта баҳолаш билан боғлиқ.
