Давлат улушлари Миллий инвестиция жамғармаси (UzNIF) устав капиталини шакллантириш учун ишлатиладиган корхона ва банклар рўйхатига навбатдаги ўзгартиришлар киритилди. Бу президентнинг 2026 йил 25 февралдаги қарорида кўзда тутилган.
Дастлаб жамғарма портфели 18 та давлат компаниясининг улуш ва акцияларидан иборат эди. 2025 йил 19 февралда ундан Uzbekistan Airports, «Микрокредитбанк», «Бизнесни ривожлантириш банки» ва «Ўзбекистон почтаси» (UzPost) чиқарилган эди. Бироқ ўшанда жамғарма «Ўзсаноатқурилишбанк» (SQB)даги улушларни қабул қилиб олган, шунингдек, «Ўзбекгидроэнерго», «Ўзбекинвест» ва «Темирйўлинфратузилма»даги улушларини кенгайтирган эди.
Янги ҳужжат билан портфелдан «Навоийазот» (25%) ва Халқ банки (30%) улушлари чиқарилиб, улар UzNIFдан давлат номидан Иқтисодиёт ва молия вазирлигига ўтказилади. Бунинг эвазига «Ўзбектелеком»даги яна 5% ва «Ўзбекинвест»даги 10% давлат улуши давлатдан Миллий инвестиция жамғармасига ўтказилади.
Шунингдек, «Ўзсаноатқурилишбанк»даги яна 10% улуш Тикланиш ва тараққиёт жамғармасидан Иқтисодиёт ва молия вазирлигига, кейинчалик эса UzNIFга ўтказиш учун берилади.
Шу тариқа, жамғарма энди дастлабки 18 та ўрнига 13 та компаниядаги улушларга (1,5 млрд долларлик) эгалик қилмоқда. UzNIF акцияларининг бирламчи оммавий таклифини (IPO) 2026 йил якунигача ўтказиш режалаштирилган. Kosta Legal ва Cleary Gottlieb Steen & Hamilton компаниялари маслаҳатчи сифатида иштирок этади.
Миллий инвестиция жамғармаси президентнинг 2024 йил 27 августдаги қарори билан ташкил этилган эди. Templeton Global Investments компанияси жамғарманинг ишончли бошқарувчиси этиб тайинланган.
Жамғарманинг асосий вазифалари этиб жамғарма соф активларининг бозор қийматини ошириш, жамғарма акцияларини етакчи хорижий фонд биржаларида жойлаштириш, жамғарма активларига инвестицияларни жалб қилиш ва уларни хусусийлаштириш жараёнларида иштирок этиш учун йирик халқаро институционал инвесторларни жалб қилиш белгиланган.
2025 йил декабрь ойи охирида Templeton Global Investments компаниясининг Марказий Осиё бўйича бош директори Мариус Дан Spot нашрига берган интервьюсида UzNIF портфели тузилмаси бошқа қайта кўриб чиқилмаслигини айтган эди.
«Йўқ, мен буни портфелнинг якуний таркиби деб ҳисоблайман. 2026 йилнинг биринчи ярмида IPO сари ҳаракат қилар эканмиз, давлат томонидан қўшимча активлар ўтказмаларини амалга ошира олмаймиз. Жамғарма айнан шу портфел билан IPOга чиқади», — деган эди.
Бошқа ўзгаришлар
Бундан ташқари, «Ўзсувтаъминот» ва «Ўзбекинвест»даги давлат улушлари Давлат активларини бошқариш агентлигидан Иқтисодиёт ва молия вазирлигига ўтказилади.
2026 йил 1 апрелга қадар «Ўзбекистон темир йўллари»га тегишли бўлган «Темирйўлинфратузилма»даги 60% улуш компаниянинг ўзидаги давлат улушини камайтириш ҳисобига давлатга (Иқтисодиёт ва молия вазирлиги тимсолида) топширилади.
Ўзбекистон Миллий банкидаги 10% улуш (ҳажми ПСБ акциялари улушига мутаносиб бўлиши керак) Иқтисодиёт ва молия вазирлигидан Тикланиш ва тараққиёт жамғармасига ўтказилади.