Навоий — Зарафшон — Учқудуқ автомобиль йўлида Kia ва Chery автомобиллари тўқнашиши оқибатида 5 киши ҳалок бўлди, деб хабар берди Kun.uz ўз манбасига таяниб.
ЙТҲ 2026 йил 7 март куни тахминан соат 16:30 ларда Навоий вилоятининг Конимех тумани ҳудудидан ўтувчи трасса кесимида юз берган. Нашр маълумотларига кўра, ҳар икки автомобилнинг тезлиги белгиланган меъёрдан юқори бўлган.
Авария натижасида Kia автомобилидаги бир оиланинг уч нафар аъзоси ҳамда Chery автомобилидаги икки киши — ҳайдовчи ва йўловчи ҳалок бўлган. Қурбон бўлганларнинг уч нафари воқеа жойида вафот этган.
«Акам Навоий кон-металлургия комбинатида ишларди. Ўша куни Зарафшонга кетаётган эди. Афсуски, бу бахтсиз ҳодиса юз берди. У жуда меҳрибон инсон эди, ҳеч кимга ёмонлик қилмаган», — деди Chery автомобили ҳайдовчиси Санжар Нурмахмедовнинг яқин қариндошларидан бири Kun.uz билан суҳбатда.
Яна бир ҳалок бўлган шахс — «Zarafshon kanal» Telegram-каналининг 17 ёшли администратори Умиджон Тўхтамуродов. Ушбу каналда 11 март куни Навоий — Зарафшон — Учқудуқ (А-379) трассасининг ҳолати ва у ерда юз бераётган ЙТҲларга доир пост эълон қилинди.
«Агар «Ташаббусли бюджет» лойиҳаси доирасида А-379 йўлини таъмирлаш бўйича ташаббус илгари сурилса, биз ва аҳоли уни қўллаб-қувватлашга ҳамда фаол овоз беришга тайёрмиз», — деб таъкидлади канал муаллифлари.
2026 йил февраль ойида Навоий вилоятининг Конимех туманида юз берган ЙТҲда 4 киши ҳалок бўлган эди. Ўшанда аварияга қувиб ўтиш қоидаларининг бузилиши сабаб қилиб кўрсатилганди.