Ижтимоий тармоқларда Тошкент вилоятининг Бўстонлиқ туманида олинган ҳайвонларга нисбатан шафқатсиз муносабатда бўлиш акс этган видеолар тарқалди.
Кадрларга кўра, хона ичида бир эркак мушукни тепиб, уни босиб қолишга ҳаракат қилади ва унга зарар етказади. Ҳайвон қочишга уринади, бироқ эпизодлардан биридан сўнг ҳаракатсиз қолади, шундан кейин эркак уни кўтариб, хонани тарк этади.
Кейинроқ кадрда қуролланган бошқа бир эркак пайдо бўлади, у ҳам иккита мушукка нисбатан шафқатсиз муносабатда бўлади, сўнгра милтиқни ўқлаб, улар томон бир неча бор ўқ узади. Алоҳида ёзувда арқонга осиб қўйилган жонсиз ҳайвон акс этган.
Тошкент вилояти ИИББнинг хабар беришича, воқеа 2025 йил декабрь ойида Бўстонлиқ тумани «Янгиқўрғон» маҳалласидаги меҳмонхоналардан бирида содир бўлган.
Бошқарма аввалроқ ушбу ҳолат бўйича мурожаатлар келиб тушмаганини қайд этди. Видеода акс этган шахс — 1993 йилда туғилган Ш. М.нинг ҳаракатлари юзасидан тегишли материаллар расмийлаштирилди. «Материаллар қонуний қарор қабул қилиш учун судга юборилди», — деб хабар берди ИИББ.
ИИВ Жамоат хавфсизлиги департаменти матбуот хизматининг аниқлик киритишича, воқеа 2025 йил 27 декабрда содир бўлган, алоқадор шахсларнинг шахси аниқланган.
Маълумотларга кўра, булар дам олиш масканида ишловчи Ш. М. ва А. А. (1996 йилда туғилган) бўлиб чиқди. Уларга нисбатан Маъмурий жавобгарлик тўғрисидаги кодекснинг 111-моддаси (Ҳайвонларга нисбатан шафқатсиз муносабатда бўлиш / 1,24 млн дан 2,06 млн сўмгача жарима) ва 220-1-моддаси (Қуролнинг ноқонуний айланиши / фуқароларга БҲМнинг 15 бараваридан 30 бараваригача жарима ёки қуролни мусодара қилиб, 15 суткагача маъмурий қамоққа олиш) билан маъмурий иш қўзғатилган.
Қурол иштирокчилардан бири — А. А.га тегишли экани, бироқ унда қурол учун рухсатнома бўлмагани қайд этилган.