Молдова президенти Майя Санду агар ушбу масала бўйича референдум ташкил этилса, ўз мамлакатининг Европа Иттифоқи ва НАТО аъзоси бўлган Руминия билан бирлашиши учун овоз беришини маълум қилди. У бу ҳақда Британиянинг 2026 йил 11 январь куни эълон қилинган The Rest is Politics подкастига берган интервьюсида айтиб ўтди.
«Агар референдум ўтказилса, мен Руминияга қўшилиш учун овоз берган бўлардим… Молдова атрофида нималар содир бўлаётганига қаранг. Дунёда нималар бўлаётганига қаранг. Молдова каби кичик давлат учун демократия сифатида, суверен давлат сифатида яшаб қолиш ва Россияга қарши туриш тобора қийинлашиб бормоқда», — деди Санду.
Reuters таъкидлашича, Молдованинг 2,4 миллион аҳолисидан тахминан 1,5 миллиони Руминия фуқаролигига эга. Бироқ, сўровномалар шуни кўрсатмоқдаки, мамлакат аҳолисининг фақат учдан бир қисмигина икки давлатнинг бирлашиши ғоясини қўллаб-қувватлайди.
Сандунинг сўзларига кўра, у молдованларнинг аксарияти унинг позициясини қўллаб-қувватламаслигини тан олади ва Европа Иттифоқи билан интеграциялашув янада реал мақсад эканини қўшимча қилди.
Санду ҳукумати 2030 йилгача ЕИга аъзо бўлиш мақсадини қўйган, бироқ бунинг учун Россиянинг қаршилиги фонида мураккаб ислоҳотларни амалга ошириш зарур, деб ёзади агентлик.
Молдова 1918 йилдан то 1940 йилда СССР томонидан аннексия қилингунига қадар Руминия Қироллиги таркибида бўлган. 1991 йилда мамлакат ўз мустақиллигини эълон қилган.
Майя Санду 2020 йилдан буён Молдовага раҳбарлик қилиб келмоқда, у мамлакат тарихидаги биринчи аёл президент бўлди. Санду евроинтеграция тарафдори бўлиб, унинг даврида, 2022 йил февраль ойи охирида Молдова ЕИга аъзо бўлиш учун ариза топширган.
2024 йилда Санду иккинчи муддатга қайта сайланди. Президентлик сайловлари билан бир вақтда мамлакатда евроинтеграция курсини конституцияда мустаҳкамлаш бўйича референдум бўлиб ўтди. ЕИга аъзо бўлиш учун сайловчиларнинг 50 фоиздан сал кўпроғи овоз берди.
