Молдова ҳукумати Мустақил Давлатлар Ҳамдўстлиги (МДҲ) билан тузилган асосий келишувларни денонсация қилиш (бекор қилиш) тартибини бошлади, бу мамлакатга ташкилот таркибидан чиқиш имконини беради. Бу ҳақда Radio Moldova эфирида мамлакат бош вазири ўринбосари ва ташқи ишлар вазири Михай Попшой маълум қилди.
Вазирнинг аниқлик киритишича, гап 1993 йил 22 январда Минскда имзоланган МДҲ Устави, 1991 йил 8 декабрдаги МДҲни ташкил этиш тўғрисидаги битим ҳамда ушбу битимга 1991 йил 22 декабрда имзоланган протокол ҳақида бормоқда.
«Молдова Республикаси энди МДҲнинг расмий аъзоси бўлмайди. Ва бу жараён аллақачон бошланди. Биз бу қарорни яқинда қабул қилдик», — дея унинг сўзларидан иқтибос келтирмоқда Newsmaker.
Попшойнинг сўзларига кўра, ҳукумат ушбу тартибни 2026 йил февраль ойи ўрталаригача якунлайди, шундан сўнг масала парламент муҳокамасига киритилади.
Вазир Молдова МДҲ билан жами 283 та келишув имзолаганини қайд этди; уларнинг 71 таси аллақачон денонсация қилинган, яна 60 га яқини бекор қилиниш жараёнида.
Шу билан бирга, Попшойнинг таъкидлашича, Кишинёв иқтисодий фойда келтирадиган ёки фуқаролар учун амалий аҳамиятга эга бўлган келишувлардан, агар улар мамлакатнинг Европа курсига зид бўлмаса, воз кечмоқчи эмас.
2024 йилда Молдовада евроинтеграция бўйича референдум ва президентлик сайловлари бўлиб ўтди. Майя Санду иккинчи муддатга қайта сайланди, Европа Иттифоқига аъзо бўлиш учун эса сайловчиларнинг 50 фоиздан сал кўпроғи овоз берди.
Молдова 2022 йил февраль ойи охирида, Россиянинг Украинага кенг кўламли бостириб кириши фонида ЕИга аъзо бўлиш учун ариза топширган эди. 2024 йил июнь ойида Европа Иттифоқи мамлакатнинг аъзолиги бўйича расмий музокараларни бошлади.