Малайзия ҳукумати 10 йил аввал, 2014 йил 8 март куни ғаройиб тарзда йўқолган Куала-Лумпур-Пекин йўналишидаги MH370 рейс қидирувини тиклашга розилик берди. Шу пайтгача ўтказилган қутқарув ва қидирув ишлари ҳеч бир натижа бермаган.
Қидирув ишларини қайта амалга оширишни Ocean Infinity корхонаси таклиф қилди. 2018 йили шу компания томонидан амалга оширилган қидирув ишлари натижа бермаган. Янги шартнома 18 ойга мўлжалланган ва 70 млн АҚШ доллари қийматида баҳоланмоқда. Шартномага асосан, ўтказилган қидирув натижаларига кўра, самолётнинг етарли даражада қолдиқ қисмлари топилмаса, Малайзия ҳукумати тўловни амалга оширмайди. Режалаштирилган қидирув ишлари Ҳинд океанининг жанубий қисмида, 15 минг км.2 ҳудудда амалга оширилади.
Ocean Infinity сувости ҳудудларда қидирув ишларини амалга ошириш билан шуғулланади. Ташкилотнинг кутилмаларига кўра, бу сафар яхши натижага эришишига ишончи комил.
MH370 рейси ҳақида.
Куала-Лумпур-Пекин йўналиши бўйича парвозни амалга ошираётган Boeing 777 самолёти, 2014 йил 8 март куни радарлардан ғойиб бўлган. Унинг ичида 12 нафар хизматчи (учувчи, стюардесса ва ҳоказо), 227 нафар йўловчи, шу жумладан, 150 хитойлик, 50 нафар Малайзия фуқароси, Франция, Австралия, Индонезия, АҚШ, Ҳиндистон, Украина, Канада ва бошқа мамлакат вакиллари бўлган.
Самолёт алоқага сўнгги марта парвоз бошланганидан 40 дақиқа ўтиб чиққан. Шундан сўнг алоқа узилган. Ҳарбий радарлар, самолёт йўналишини ўзгартириб, Малайзиянинг шимолий қисми ва Андаман денгизидан ўтганини аниқлаган. Шундан сўнг, жануб томонга ҳаракатланиб, алоқа тўлалигича йўқотилган.
Ҳозирги кунда, самолёт фалокатга учраган деб топилган ва унинг қисмлари Африка ва Ҳинд океанидаги оролларнинг соҳилларидан топилган.
MH370 рейсининг йўқолиши бўйича ўтказилган изланишлар ҳисоботига кўра, бу вазиятни асосий сабаблари аниқланмаган. Нима учун йўналиш ўзгартирилганлиги, самолётни бошқарган учувчиларнинг психологик ёки бошқа муаммолари борлиги аниқланмаган.
