Ўзбекистон президенти Шавкат Мирзиёев молиявий технологиялар соҳасини янада ривожлантириш чора-тадбирлари тўғрисидаги қарорни имзолади, деб хабар беради Марказий банк матбуот хизмати.
Ҳужжат билан 5 йилга мўлжалланган Финтех миллий стратегиясини ишлаб чиқиш топширилди. Соҳани ривожлантириш ва молиявий технологиялар соҳасидаги барча ташаббусларни мувофиқлаштириш ушбу ҳужжат доирасида амалга оширилади.
2030 йилгача финтех-стартапларга 1 миллиард доллар инвестиция жалб қилиш режалаштирилган. Йирик сармоялар оқими бозорда рақобатни кучайтириши ва янги технологик ечимларнинг пайдо бўлишини тезлаштириши кутилмоқда.
Марказий банк ҳузурида ҳажми 50 миллион доллар бўлган венчур фонд (2026 йил 1 июлгача хорижий компанияга ишончли бошқарувга берилади) ва инновацион хаб ташкил этилади. Бу ерда стартапларни молиявий қўллаб-қувватлаш, менторлик дастурлари, ўқитиш ва акселерация бирлаштирилади, бу эса янги ғояларни жорий этишни тезлаштириши ва ёшлар учун имкониятларни кенгайтириши кутилмоқда.
2026 йил 1 январдан инновацион хаб иштирокчиларига қуйидаги харажатларнинг ўрни қопланади:
- молиявий технологиялар йўналишида курслардан ўтиш ва сертификатлар олиш билан боғлиқ харажатларнинг 50 фоизигача, лекин 20 минг доллардан кўп бўлмаган миқдорда;
- тадбиркорларни инкубация ва акселерация дастурларини амалга оширувчи молиявий технологиялар соҳасидаги стартап-лойиҳалар учун менторлар ва тренерларни жалб қилиш билан боғлиқ харажатларнинг 50 фоизигача, лекин 50 минг доллардан кўп бўлмаган миқдорда.
Бундан ташқари, 5000 нафар мутахассис тайёрлаш ва 100 та стартапни акселерациядан ўтказиш режалаштирилган.
Банкларда Open Banking (Очиқ банкинг) тамойиллари — банклар, тўлов ташкилотлари ва финтех-компаниялар ўртасида маълумотларни стандартлаштирилган ва хавфсиз алмашиш жорий этилади.
2025 йил охиригача Марказий банк ва тижорат банкларида маълумотларга асосланган бошқарувга ўтиш учун маълумотларни бошқариш бўйича директор (Chief Data Officer) лавозими пайдо бўлади.
Президент иштирокида 2025 йил сентябрь ойида бўлиб ўтган йиғилишда Марказий банк финтех-ислоҳотлар координатори этиб белгиланган эди: унинг ҳузурида лойиҳалар муваффақиятини баҳолаш, стартаплар ва финтех-компанияларни қўллаб-қувватлаш, улар учун молиялаштириш жалб қилиш бўйича махсус офис ташкил этилади.
