Tesla ва SpaceX раҳбари, собиқ DOGE (Ҳукумат самарадорлиги департаменти) раҳбари Илон Маск АҚШ президенти Дональд Трампга нисбатан айтган сўзларидан афсусда эканини билдирди.
“Ўтган ҳафта АҚШ президенти Дональд Трамп ҳақидаги баъзи постларимдан афсусдаман. Улар ҳаддан ошиб кетди”, — дея ёзди Маск Х ижтимоий тармоғида.
Миллиардер қайси постлар ҳақида гап кетганига аниқлик киритмади. Сўнгги кунларда у Лос-Анжелесдаги норозилик намойишлари фонида Трампнинг иммиграция сиёсатини қўллаб-қувватловчи твитларни ҳам репост қилган эди.
Трамп ҳозирча Маскнинг узр сўрашига жавоб қайтармади.
Маск ва Трамп ўтган ҳафтада тадбиркор Конгрессдан ўтаётган “Катта чиройли қонун лойиҳаси” (Big Beautiful Bill)ни танқид қилганидан сўнг оммавий равишда тортишиб қолишган эди. Ҳужжат солиқ имтиёзларини назарда тутади ва Трампнинг сайловолди ваъдаси эди.
Маск ўз кўмагисиз Трамп президентлик сайловларида ғалаба қозона олмаган бўлар эди, деб айтди ва уни ношукрликда айблади. У, шунингдек, Трамп вояга етмаганларга нисбатан зўравонликда ва уларни фоҳишаликка жалб қилишда айбланган молиячи Жеффри Эпштейн билан боғлиқ бўлган “Эпштейн файллар” деб аталувчи нашр этилмаган файлларда қайд этилганини айтди (Эпштейн 2019 йилда қамоқхонада ўз жонига қасд қилган). Кейинчалик Маск бу постни ўчириб ташлади.
Трамп жавобан миллиардер компанияларини давлат шартномаларидан маҳрум қилиш билан таҳдид қилди.
Маск Трамп номзодини очиқчасига қўллаб-қувватлади, унинг сайловолди кампаниясида фаол иштирок этди ва уни молиялаштирди. Тадбиркор 2024 йилги сайловларга 290 миллион доллардан ортиқ маблағ сарфлаб, Трампнинг АҚШ президенти лавозимига сайланишини ва республикачиларнинг Конгрессга киришини қўллаб-қувватлади.
