Фарғона вилоятининг Марғилон шаҳрида маҳалла раиси 17 ёшли қизга жинсий шилқимлик қилгани учун ҳибсга олинди. Ушбу иш 2025 йил 1 август куни Марғилон шаҳар жиноят ишлари судида кўриб чиқилган.
Иш ҳужжатларига кўра, 2025 йил 7 июнь куни соат 14:00 да 47 ёшли И. Р. раҳбарлик қилаётган «Хўжа Порсо» маҳалла фуқаролар йиғини биносида вояга етмаган 17 ёшли қизга бўйи пастлиги ва букр эканлигини айтган.
Кейин, жисмоний машқлар ўргатиш баҳонасида қизнинг хоҳишига қарши унинг белидан ушлаб, қўлларини ўз елкасига қўйган, кўтарган ва ўпмоқчи бўлган.
Судда эркак қизни компьютер билан боғлиқ ишларда ёрдам бериш учун ишга олинганини маълум қилди. Унинг сўзларига кўра, 2025 йил 7 июнь куни қиз бели ва бўйни оғриётганидан шикоят қилган ва у гўёки хизмат хонасида унга жисмоний машқлар ўргатган. Кейин, қизга машқ ёққани сабабли, унга буни уйда ҳам такрорлаш ва турникда осилиб туришни маслаҳат берган.
Маҳалла раисининг сўзларига кўра, 2025 йил 22 июнь куни қизнинг онаси унга қўнғироқ қилиб, шилқимликда айблаган ва ҳақорат қилган. У қизнинг бели ва қўлларидан бошқа ҳеч бир жойига тегмаганини таъкидлаб, ўз ҳаракатларининг юридик оқибатлари ҳақида ўйламаганини айтиб, суддан жазони енгиллатишни сўради.
Жабрланувчи судда 2025 йил 7 июнь куни маҳалла раиси И. Р. «ғамхўрлик» кўрсатиб, унга букр эканини ва чора кўрилмаса, «кампирдек» бўлиб, бўйи паст бўлиб қолишини айтганини билдирди. Шу баҳонада унга жисмоний машқлар ўргатишни бошлаган. Қаршилик кўрсатганига қарамай, у алдов йўли билан унинг қўлларини ўз елкасига қўйишга мажбурлаган, белидан ушлаб, кўтарган ва орқага эгилишга мажбурлаган.
Қиз машқ унга ёқмаганини, лекин И. Р. бу фойдали деб туриб олгани ва уни 5-6 марта такрорлаганини таъкидлади. Бундан ташқари, у ҳужжат олиш учун унинг кабинетига кирганида, эркак: «Юзингда холинг бор экан, шу жойидан ўпиб қўяйми?» деб шилқимлик қилган. Жабрланувчи суддан эркакка нисбатан қонуний чора кўришни сўради.
Суд И. Р.ни Маъмурий жавобгарлик тўғрисидаги кодекснинг 41-1-моддаси (Жинсий шилқимлик) билан назарда тутилган ҳуқуқбузарликни содир этганликда айбдор деб топиб, унга 4 сутка маъмурий қамоқ жазосини тайинлади.
