Ўзбекистонда маҳкум аёллар учун касб-ҳунар ўрганиш ва олий ўқув юртларида масофавий таълим олиш учун шароитлар яратилади. Бу ҳақда Ўзбекистон президенти Халқаро хотин-қизлар кунига бағишланган тантанали маросимда маълум қилди.
Унинг сўзларига кўра, ҳозирда Ўзбекистоннинг жазони ижро этиш муассасаларида 2589 нафар аёл жазо ўтамоқда, улардан 1239 нафари ўрта маълумотга эга бўлса-да, касб-ҳунарга эга эмас. Уларнинг 443 нафари олий ўқув юртларида ўқиш истагини билдирган. Маҳкум аёлларни ижтимоий реабилитация қилиш мақсадида «Янги ҳаёт» дастури ишга туширилади.
«Турли шароитлар тақозоси билан, билмасдан жиноят содир этган бу аёллар ҳам мамлакатимиз фуқаролари. Биз уларни ижтимоий реабилитация қилиш, жамиятнинг тўлақонли аъзоларига айланиши ҳақида жиддий ўйлашимиз керак», — деди давлат раҳбари.
Ички ишлар вазирлиги Профессионал таълим агентлиги ҳамда Камбағалликни қисқартириш ва бандлик вазирлиги билан ҳамкорликда маҳкум аёллар учун 3-6 ойлик касб-ҳунар дастурлари бўйича ўқитишни ташкил этади. Курсларни тамомлаганларга сертификатлар берилади.
Бундан ташқари, маҳкум аёллар учун кириш имтиҳонларини топшириш, олий ўқув юртларига кириш ва масофавий ўқиш имконияти яратилади. Ўқишга контракт асосида кирганлар учун жазони ўтаб бўлганидан ва ишга жойлашганидан кейин қайтариш шарти билан фоизсиз заём ажратилади, деди президент.