АҚШ президенти Дональд Трамп шанба куни, 2025 йил 7 июнь куни, иммиграция рейдларига жавобан бошланган норозилик намойишларини тарқатиш учун Лос-Анжелесга 2000 нафар Миллий гвардия жангчисини киритиш ҳақидаги фармонни имзолади.
Митинглар ўтган жума куни АҚШ Иммиграция ва божхона полицияси (ICE) томонидан Лос-Анжелеснинг бир туманида ўтказилган рейдлардан сўнг бошланган эди. Намойишчилар ва федерал агентлар ўртасида тўқнашувлар содир бўлди.
Намойишчилар чегара патрули автомобилларига тухум ва тош отдилар. Бунга жавобан ҳуқуқни муҳофаза қилиш органлари резина ўқлар ва шовқинли гранаталар қўлладилар. Камида 44 киши ҳибсга олинди.
Эртаси куни норозилик намойишлари Лос-Анжелес атрофидаги ҳудудларга, жумладан, аҳолиси асосан лотин америкаликлардан иборат Парамаунтга ҳам тарқалди.
Трампнинг фармонида айтилишича, иммиграция қонунларининг ижро этилишига тўсқинлик қилувчи норозилик намойишлари АҚШ ҳукуматига қарши “исён шакли” ҳисобланади. Унда Миллий гвардия ҳарбий хизматчилари “ICE ходимлари ва федерал вазифаларни бажараётган бошқа АҚШ ҳукумат органларини вақтинча ҳимоя қилишлари” қайд этилган.
Ҳужжатда, шунингдек, улар 60 кунга жойлаштирилиши, якуний қарор эса АҚШ Мудофаа вазирига қолиши айтилган.
Калифорния губернатори Гевин Ньюсом Трампнинг қарорини “қасддан фитначилик” деб атади. Унинг сўзларига кўра, ҳукумат Миллий гвардияни “ҳуқуқни муҳофаза қилиш органлари ходимлари етишмаётгани учун эмас, балки улар шоу истаётгани учун” жойлаштирмоқда.
“Уларга шоу қилманг. Ҳеч қачон зўравонлик ишлатманг. Тинч йўл билан фикр билдиринг”, – деб мурожаат қилди у намойишчиларга.
2025 йил 8 июнь куни кечқурун Ньюсом АҚШ Мудофаа вазири Пит Ҳегсетга йўлланган расмий хат ҳам эълон қилди. Губернатор қўшинларни киритиш ҳақидаги буйруқни бекор қилишни талаб қилди. У ҳудудда “Трамп аралашмагунча” муаммолар бўлмаганини таъкидлади. Миллий гвардия қўшинларининг Лос-Анжелесга жойлаштирилишини Ньюсом “суверенитетнинг бузилиши” ва “кескинликни кучайтириш” деб атади.
