Хитойнинг Leapmotor автокомпанияси ўзининг C16 электромобили Ўзбекистонда сертификатдан ўтмагани ҳақидаги баёнотга муносабат билдирди.
2025 йил март ойининг охирида техник тартибга солиш соҳасида назорат инспекцияси агентлигига қарашли UzTest Ўзбекистон илмий-синов марказига Leapmotor енгил автомобилларини сертификатлаш жараёнини тўхтатиш сўрови билан мурожаат қилган эди.
Бу қарорга сабаб — C16 моделидан аниқланган электромагнит халақитлар миқдори белгиланган меъёрдан юқори бўлгани. Ҳатто бу қоидабузарлик фақатгина битта моделда аниқланган бўлса-да, бутун бренд автомобилларини сертификатлаш жараёни тўхтатилган.
Синовларни тўхтатиш амалда мамлакатга автомобилларни олиб киришни тақиқлашни англатади, чунки сертификатсиз транспорт воситалари импорт қилиниши мумкин эмас. Инспекция ҳозиргача нега бутун бренд қаторига чеклов қўйилганини тушунтиргани йўқ.
2025 йил 9 апрель куни Leapmotor Weibo платформасида расмий баёнот эълон қилди. Компания синов натижалари билан рози эмаслигини ва қайта тестдан ўтишга тайёр эканини маълум қилди. Бу ҳақда Spot эътибор қаратди.
Leapmotor синов натижаларини тан олмаслигини билдирди.
«Огоҳлантиришда тилга олинган автомобиль компаниянинг ўзи томонидан тестга тақдим этилмаган. Синов шартлари ва ушбу автомобиль ҳолати номаълум, шу боис компания тест натижалари юзасидан шубҳа билдириш ҳуқуқини ўзида сақлаб қолади», — дейилади баёнотда.
Компания, шунингдек, Ўзбекистон регулятори билан алоқада эканини ва қайта синовни ташкил этиш устида иш олиб бораётганини маълум қилди.
«Синов жараёнлари юзасидан қўшимча маълумотлар берилади. Умид қиламизки, ошкора ва холис жараён орқали Leapmotor маҳсулотлари юзасидан ишончли тасаввур ҳосил қилиш мумкин бўлади», — дейилади компания хабарида.
2023 йил ноябридан бошлаб Техник тартибга солиш агентлиги импорт автомобилларининг техник кўригидан ўтиш тартибини ўзгартирган. Энди транспорт воситалари божхона ҳудудида эмас, балки махсус полигонда синовдан ўтказилади ва бу ерда электромагнит мослик текшируви жорий этилган.
Янги тартиб расмий дилер ҳисобланмайдиган жисмоний шахслар ва хусусий тадбиркорлар томонидан олиб кирилаётган автомобилларга тааллуқли. Синовларни агентликнинг UzTest деб номланган дочер корхонаси ўтказади. Айрим бозор иштирокчилари бу ҳолат манфаатлар тўқнашувига олиб келиши мумкинлигини таъкидлаган.
Айни пайтда жамоатчилик вакиллари бу ҳолатни маҳаллий ишлаб чиқарувчилар учун бозорни «тозалаш» уриниши сифатида баҳолади. Блогер Умид Ғафуров Европа бозорида ҳам сотилаётган Leapmotor Ўзбекистонда «камчилик» топилганига ҳайрат билдирди, ҳолбуки, 30 йилдан бери ишлаб чиқарилаётган Damas модели «гуёки савол туғдирмаяпти». Leapmotor Ўзбекистонда автомобиль синов натижалари билан рози эмаслигини билдирди.
