Ўзбекистон президенти Шавкат Мирзиёев 2026 йил 27 январь куни бўлиб ўтган йиғилишда Ички ишлар вазирлигида уч йил аввал ташкил этилган Киберхавфсизлик маркази фаолиятини танқид қилиб, сезиларли натижалар йўқлигини таъкидлади.
Расмий маълумотларга кўра, 2025 йили Тошкентда кибержиноятлар сони 16 мингдан ошган. Фуқароларга қарийб 2 триллион сўм миқдорида моддий зарар етказилган, бундай жиноятларнинг очилиш даражаси эса 8 фоизга ҳам етмайди.
Давлат раҳбари жиноятчилар банк тизимидаги заифликлардан, аҳолининг ишонувчанлиги ва рақамли саводхонлик даражаси пастлигидан фаол фойдаланаётганини қайд этди.
«Мен ички ишлар органлари ва прокуратура учун бу йўналишдаги барча масалаларни ҳал қилиб бердим. Натижа қани? Банклар ва тўлов ташкилотларида ҳимоя тизимларини жорий этиш қачон якунланади?» — дея давлат раҳбари масъуллар олдига қатъий савол қўйди.
Аввалроқ ИИВ 2024 йилда Ўзбекистонда кибержиноятлар улуши умумий жиноятларнинг 44,4 фоизини ташкил этгани ҳақида хабар берган эди. Кибержиноятларнинг 98 фоизи банк карталари билан боғлиқ бўлиб, тўрт йил ичида фуқаролардан 1,9 триллион сўм ўғирланган. Киберхавфсизлик маркази маълумотларига кўра, фойдаланувчиларни алдаш учун дипфейклардан кенг фойдаланилмоқда.