Ўзбекистонда Вазирлар Маҳкамаси ҳузурида касб-ҳунар таълими ва касбий ўқитиш соҳасида ягона давлат сиёсатини амалга оширишга масъул бўлган янги орган — Касб-ҳунар таълими агентлигини ташкил этиш режалаштирилган. Ушбу ташаббус 2025 йил 8 сентябрь куни президент ҳузурида ўтказилган йиғилишда илгари сурилган.
Янги тузилма касб-ҳунар таълими тизимини бошқариш ва унинг услубий таъминотини мувофиқлаштириш, шунингдек, ушбу соҳада ягона сиёсатни олиб бориш билан шуғулланади. Олий таълим, фан ва инновациялар вазирлиги департаменти бошлиғи Шоҳназар Шарофиддинов «Ўзбекистон 24» телеканалига берган интервьюсида касб-ҳунар таълими бўйича функция ва вазифалар ҳозирда бир нечта идораларга тарқалиб кетганини аниқлаштирди.
Агентлик тайёрлов олиб бориладиган касблар ва мутахассисликлар номларини, малака даражаларини, ўқишнинг минимал муддатларини, битирувчилар билимини баҳолаш тартибини ва муассасаларнинг ўқув-услубий базасига қўйиладиган талабларни белгилайди.
Фаолиятнинг асосий йўналишларидан бири умр давомида узлуксиз таълим (life-long learning) тамойилини жорий этиш бўлади. Касб-ҳунар таълими муассасаларида педагог кадрларни аттестациядан ўтказиш ва уларга малака тоифаларини бериш тизими жорий этилади.
Шоҳназар Шарофиддинов таълим ва ишлаб чиқаришни интеграциялашни жадаллаштириш, шунингдек, ишлаб чиқариш корхоналарининг дуал таълимни шакллантиришда иштирокини ошириш учун уларга имтиёзлар берилишини маълум қилди. Дуал таълим бўйича ўқувчилар сонини 34 мингдан 150 мингга ошириш режалаштирилган.
Бундан ташқари, унинг сўзларига кўра, Ўзбекистонда касбий ўқитиш тизимига хорижий таълим дастурларини, жумладан, Хитой тажрибаси асосида кенг жорий этиш режалаштирилган.
Эслатиб ўтамиз, Ўзбекистонда барча колледж ва касб-ҳунар мактабларини техникумларга айлантириш, биноларнинг бир қисмини мактабларга бериш режалаштирилган. Техникумлар қисман академик мустақилликка эга бўлади ва пуллик хизматлар кўрсатиши мумкин. Уларнинг 14 тасида Британиянинг BTEC дастури жорий этилади.
