Ўзбекистон Жаҳон савдо ташкилоти (ЖСТ)га аъзо бўлиш жараёни доирасида Буюк Британия билан икки томонлама музокараларни якунлади. Бу ҳақда президентнинг ЖСТ масалалари бўйича махсус вакили Азизбек Урунов LinkedIn ижтимоий тармоғида хабар берди.
«Ўтган ой охирида биз Буюк Британия томони билан икки томонлама музокаралар олиб бориш учун Лондонда эдик. Энди уларнинг якунланганини эълон қилишдан мамнунман. Ўшандан бери биз ички процедуралардан ўтдик ва 2025 йил 12 июнь куни Женевада бўлиб ўтадиган ишчи гуруҳининг 10-йиғилиши доирасида тегишли баённомани имзолашга тайёргарлик кўрмоқдамиз», — деди Урунов.
Шу тариқа, Буюк Британия Ўзбекистон бозорларга кириш бўйича музокараларни якунлаган 24-давлат бўлди. Бу натижа май ойи бошида ЖСТга аъзо бўлиш жараёни тўғрисидаги ҳисобот давомида Ўзбекистон президентига тақдим этилган эди.
Азизбек Урунов Ўзбекистоннинг ташкилотга киришини қўллаб-қувватлагани учун Буюк Британия томонига миннатдорлик билдирди, шунингдек, миллий музокаралар гуруҳининг фидокорона меҳнати учун ташаккур айтди.
«Икки томонлама музокараларни тўлиқ якунлаш учун ЖСТга аъзо бўлган бир нечта мамлакат қолди», — дея қўшимча қилди у.
2025 йил май ойида президент Шавкат Мирзиёев йил охирига қадар ЖСТга кириш бўйича қолган 9 та мамлакат билан икки томонлама музокараларни якунлаш, Ишчи гуруҳининг яна иккита йиғилишини ўтказиш ва унинг якуний ҳисоботи лойиҳасини тайёрлашни якунлаш бўйича топшириқ берган эди.
Эслатиб ўтамиз, 2025 йилнинг март ойига қадар 21 та давлат билан музокаралар якунланган эди. Президентнинг ЖСТ масалалари бўйича махсус вакили Азизбек Урунов Ўзбекистон Россия, Евроиттифоқ, Буюк Британия, Швейцария ва бошқа давлатлар билан музокараларни якунлаши кераклигини таъкидлаган эди.
