Жаҳон соғлиқни сақлаш ташкилоти (ЖССТ) Ҳиндистонда аниқланган, ифлосланган шамоллаш ва йўтал сироплари партиялари ҳақида огоҳлантириш эълон қилди.
Гап Sresan Pharmaceutical, Rednex Pharmaceuticals ва Shape Pharma компаниялари томонидан ишлаб чиқарилган COLDRIF, Respifresh TR ва ReLife сиропларининг айрим партиялари ҳақида бормоқда. Уларда диэтиленгликол (ДЭГ) аралашмалари аниқланган. Унинг миқдори рухсат этилган меъёрдан қарийб 500 баравар ортиқ бўлган.
ЖССТ ушбу препаратлар жиддий хавф туғдириши ва оғир, ўлимга олиб келувчи асоратларни келтириб чиқариши мумкинлигини таъкидлади. «Диэтиленгликол ичга қабул қилинганда инсон организмига заҳарли таъсир кўрсатади ва ўлимга олиб келиши мумкин. Кўрсатилган препаратлар хавфли бўлиб, уларни, айниқса, болалар қабул қилиши оғир заҳарланиш ёки ўлимга сабаб бўлиши мумкин», — дейилади баёнотда.
Ҳиндистоннинг Дори воситалари стандартларига риоя этилишини назорат қилиш марказий ташкилоти (CDSCO) 2025 йил 8 октябрь куни сиропларда диэтиленгликол борлиги ҳақида хабар берди. Бундан бир ҳафта олдин ЖССТ Ҳиндистонда болалар ўртасида ўткир касалликлар ва ўлим ҳолатлари аниқлангани ҳақидаги маълумотга эътибор қаратган эди. CDSCO маълумотларига кўра, касалланган болалар ифлосланган сиропларни қабул қилишган.
CDSCO Ҳиндистон ҳукумати ушбу препаратларни ишлаб чиқарувчи компанияларнинг фаолиятини зудлик билан тўхтатиш ва уларнинг рўйхатдан ўтказиш гувоҳномаларини тўхтатиб қўйиш тўғрисида фармойиш берганини тасдиқлади.
Бугунги кунга қадар Ҳиндистоннинг Мадҳя-Прадеш ва Ражастхан штатларида кўрсатилган сиропларни қабул қилгандан сўнг камида 20 нафар боланинг вафот этгани маълум. BBC News нашрининг ёзишича, Мадҳя-Прадешдаги ўлим ҳолатларининг аксарияти COLDRIF сиропи туфайли 5 ёшгача бўлган болалар ўртасида содир бўлган.
«CDSCO ЖССТга ифлосланган препаратлар Ҳиндистондан ташқарига олиб чиқилмаганини ва ҳозирда уларнинг мамлакатдан ноқонуний экспорт қилингани ҳақида ҳеч қандай белги йўқлигини маълум қилди», — дейилади ЖССТ баёнотида.
Шунга қарамай, ташкилот бундай дорилар нотартиб сотиш каналлари орқали бошқа мамлакатларга ҳам ўтиши мумкинлигидан огоҳлантирди ва маҳсулот айланмаси устидан назоратни кучайтиришни тавсия қилди.
Аввалроқ Ўзбекистон Соғлиқни сақлаш вазирлиги ҳузуридаги Фармацевтика маҳсулотлари хавфсизлиги маркази Sresan Pharma’нинг COLDRIF препарати Ўзбекистонда рўйхатдан ўтмаганини хабар қилган эди.
Идора «Дори воситалари ва фармацевтика фаолияти тўғрисида»ги қонунга мувофиқ, дори воситалари, тиббиёт буюмлари ва тиббиёт техникаси улар давлат рўйхатидан ўтказилгандан сўнг тиббиёт амалиётида қўллашга рухсат этилишини эслатиб ўтди.
2022–2023 йилларда Ҳиндистоннинг Marion Biotech компанияси томонидан ишлаб чиқарилган «Док-1 Макс» ва «Амбронол» сироплари Ўзбекистонда камида 68 нафар боланинг ўлимига ва яна 16 нафар боланинг ногирон бўлиб қолишига сабаб бўлган эди.
