Ўзбекистон Президенти Шавкат Мирзиёев 2025 йил 2 декабрь куни Жиззах вилоятига қилган сафари давомида қурилган кўп тармоқли тиббиёт маркази билан танишди, дея хабар берди давлат раҳбари матбуот хизмати.
Тиббий муассаса етти қаватли бинода жойлашган бўлиб, кунига 400 нафаргача беморни қабул қилишга мўлжалланган. Стационар 344 ўринга эга. Марказ 100 миллиард сўмдан ортиқ қийматдаги ускуналар: МРТ, МСКТ аппаратлари, шунингдек, лаборатория комплекслари ва хирургия техникаси билан жиҳозланган.
Тиббиёт марказида кластер ёндашуви қўлланилган, бир комплексда поликлиника, радиология, кардиохирургия, нейрохирургия, офтальмология ва урология бўлимлари жойлашган.
Марказ ишга туширилиши билан Жиззах вилояти аҳолисининг республика клиникаларига ёки қўшни вилоятларга мурожаат қилиш зарурати 75-80% га қисқаради, дея таъкидлади президент матбуот хизмати.
Клиника мутахассисларнинг малакасини ошириш, диагностика ва даволашнинг янги усуллари ҳамда тиббий стандартларни жорий этиш мақсадида Қозон федерал университети билан ҳамкорликни йўлга қўйишни режалаштирмоқда.
Президент соғлиқни сақлаш тизими раҳбарлари ва ходимлари билан суҳбатлашди.
«Одамларни бино ёки шароитдан кўра, хизмат сифати, билим, шифокорнинг профессионаллиги ва ҳалоллиги қизиқтиради. Бемор шифохонага келганда, аввало эътибор, аниқ ташхис, тезкор ва сифатли даволанишни кутади. Шу боис, бош вазифа — одамларга чин дилдан хизмат қилинадиган, мутахассислар юқори малака ва компетенцияга эга бўлган тиббиёт тизимини яратиш», — деди президент.
Давлат раҳбари Қозон федерал университети Жиззах филиали ўқитувчи ва талабалари билан мулоқот ўтказди.
Жиззах вилоятига сафари доирасида президент йўл инфратузилмаси ва реновация лойиҳалари, шунингдек, АЭС қурилиши билан танишган эди.