Ўзбекистон президенти Шавкат Мирзиёев 2026 йил 27 январь куни бўлиб ўтган йиғилишда уюшган жиноий гуруҳлар фаолиятига чек қўйиш бўйича кўрилаётган чоралар етарли эмаслигини танқид қилди.
Унинг сўзларига кўра, бундай шахслар хорижга чиқиб, уюшган жиноий гуруҳлар тузмоқда ва у ерда ҳам ўз ҳамюртларини талон-торож қилмоқда.
Давлат раҳбари авваллари асосан «кўча жиноятчилиги» сифатида қабул қилинган уюшган жиноятчилик бугунги кунда тобора кўпроқ бизнес ниқоби остида ҳаракат қилаётгани ва сердаромад соҳаларга кириб бораётганини қайд этди.
Хусусан, кўп квартирали уйлар ва автомобиллар олди-сотдиси, молиявий пирамидалар яратиш, шунингдек, Ҳаж ва Умра зиёратларини ташкил этиш соҳаларида жиноятлар кўпайган.
Президентнинг айтишича, биргина Тошкент шаҳрида уй-жой билан боғлиқ фирибгарликлар оқибатида 3000 дан ортиқ фуқарога 1,3 триллион сўмдан ортиқ зарар етказилган. Шунингдек, аҳолининг ҳуқуқий саводхонлигини ошириш бўйича масъул органлар иши етарли эмаслиги кўрсатиб ўтилди. Тизимли тушунтириш ишлари йўқлиги сабабли одамлар фирибгарлар тузоғига тушишда давом этмоқда.
Ўзбекистоннинг БАА, Туркия, АҚШ ва қатор бошқа давлатлардаги элчихоналарида ички ишлар органлари вакиллари лавозимлари жорий этилади. ИИВ вакиллари қонун устуворлигини таъминлаш, зўравонликка қарши курашиш ва хориждаги Ўзбекистон фуқароларининг жиноий йўлларга кириб қолишининг олдини олиш учун хорижий ҳуқуқни муҳофаза қилиш органлари билан ҳамкорлик қилади.
Шавкат Мирзиёев трансчегаравий ва виртуал маконда уюшган жиноятчиликка қарши курашишнинг ягона тизимини шакллантириш бўйича топшириқ берди. ИИВ тузилмасида уюшган жиноятчиликка қарши курашиш бўйича алоҳида бўлинма ташкил этиш режалаштирилган.
Жиноий гуруҳлар таркиби ҳақидаги маълумотлар алоҳида хавотир уйғотди. Йиғилишда айтилишича, ўтган йили Тошкентда қўлга олинган уюшган жиноий гуруҳ аъзоларининг 259 нафари «оғир» тоифага мансуб бўлиб, улар ёшлар ва спортчилар. Кўплаб спортчилар кўча безорилигига жалб этилаётгани, ҳудудларда пул мукофоти учун яширин жанглар ташкил этиш ҳолатлари кўпайгани таъкидланди. Президент бу соҳада назоратни кучайтириш, шунингдек, яккакураш билан шуғулланувчи ёшларни профессионал тайёрлаш ва уларнинг салоҳиятини ҳисобга олган ҳолда ишга жойлаштириш тизимини яратиш бўйича топшириқ берди.
Давлат раҳбари аввалроқ уюшган ва наркожиноятчиликка қарши курашда масъулларда қатъият етишмаётганини айтган эди. Вазият Президент администрацияси шуғулланишни бошлаганидан кейин ўзгарди, деди. 3 ой ичида 50 га яқин йирик наркогуруҳ фош этилди. «Энг ёмони — фуқароларимиз хорижда ҳам товламачилик ва зўравонлик билан шуғулланмоқда».
2025 йил декабрь ойи охирида президент Ўзбекистонда жиноий тузилмаларнинг ўзларини қонундан устун қўйиш ва бизнесга босим ўтказишга уринишлари кузатилаётганини, бунга спортчилар ҳам жалб этилаётганини қайд этган эди. Президент давлат бундай гуруҳлар фаолиятига чек қўйиш учун етарли кучга эга эканидан огоҳлантириб, парламентни қонунларни кучайтиришга чақирган эди.