Маданият ва санъатни ривожлантириш фонди суперюлдуз Женнифер Лопеснинг 2025 йил 7 август куни «Миллий» (Бунёдкор) стадионида бўлиб ўтган Up All Night: Live in 2025 жаҳон турнеси доирасидаги Тошкент концерти якунлари билан ўртоқлашди.
Тадбир ташкилотчиси сифатида иштирок этган фонд маълумотларига кўра, бу Ўзбекистон тарихидаги ААА тоифали — халқаро таснифга кўра, энг машҳур ижрочилар томонидан берилган биринчи концерт бўлди. Ташкилотнинг таъкидлашича, бу каби шоулар мураккаб техник тайёргарликни талаб қилади. Хонанданинг гастроллари 8 июлдан 12 августгача 13 мамлакатнинг 20 та шаҳрида бўлиб ўтади, Лопес билан бирга 90 дан ортиқ кишидан иборат жамоа Тошкентга келган.
Стадионга 31 144 киши, шу жумладан хизмат кўрсатувчи ходимлар билан бирга. Концертга 25 мингта чипта сотилган, уларнинг 67%ни хорижликлар сотиб олган. Ўзбекистонга 15 330 нафар хорижий турист, жумладан, 8945 нафар россиялик, 2495 нафар қозоғистонлик, шунингдек, АҚШ ва Европа давлатларидан меҳмонлар келган.
«Ўзбекистон 24» телеканали хабарига кўра, чипталар нархи 1 миллион сўмдан 4,2 миллион сўмгача бўлган. Шу тариқа, концертдан тушган потенциал даромад 25 млрд (1,97 млн доллар) дан 105 млрд сўмгача (8,28 млн доллар) деб баҳоланмоқда.
Фонд концертни ташкил этиш учун давлат бюджетидан маблағ ажратилмаганини алоҳида таъкидлади. Чипталар савдосига CA Entertainment компанияси масъул бўлган.
Концерт ўтказилган даврда пойтахт меҳмонхоналарининг тўлиқлиги ўтган йилнинг шу даврига нисбатан 25,7 фоизга ошган. 7 август куни «Чилонзор» метро линиясида йўловчилар оқими 16,5 минг кишига кўпайган.
Меҳмонлар учун қулайлик яратиш мақсадида тўртта бепул автобус йўлга қўйилган. Шоуга тайёргарлик кўриш ва уни ўтказишда 115 та ташкилот иштирок этди, 18 та фудкорт ва савдо нуқталари ишлаган.
Фонд маълумотларига кўра, концерт Тошкентда 42,5 млрд сўмдан (3,3 млн доллар) ортиқ солиқ тушумларига ёрдам берган. «Концерт хорижий ва маҳаллий туристларни, шунингдек, меҳмонхона ва ресторан бизнесини жалб қилиш учун кучли рағбат бўлди», — дейилади фонд хабарида.
Шу билан бирга, концерт натижасида олинган солиқ тушумлари ва даромадлар (авиакомпаниялар, меҳмонхоналар, кафе ва ресторанлар) тақсимоти, шунингдек, ҳисоблаш услубияти ошкор этилмаган.
Тартибни таъминлаш учун 88 та йўл-патруль ва махсус техника, 8 та тез тиббий ёрдам машинаси, 3800 нафар ҳуқуқ-тартибот органи ходими, 300 нафар кўнгилли ва 500 нафар ҳудудни тозалаш бўйича ходим жалб этилган.
Фонднинг таъкидлашича, концерт аввалги йирик тадбирларга қараганда тартиблироқ ва уюшқоқлик билан ўтган ҳамда Ўзбекистоннинг жаҳон даражасидаги тадбирларни ўтказиш бўйича юқори салоҳиятини исботлаган.
