Сеул марказий туман суди Жанубий Кореянинг собиқ президенти Юн Сок Ёлни исёнга раҳбарлик қилганлик учун умрбод қамоқ жазосига ҳукм қилди. Суднинг фикрича, 2024 йил декабрь ойида ҳарбий ҳолат жорий этилиши айнан исён деб баҳоланди, деб хабар бермоқда Yonhap.
Юн Сок Ёль депутатларнинг унинг фармонига қарши овоз беришига тўсқинлик қилиш мақсадида Миллий ассамблея (парламент) биноси ҳудудини қуршаб олиш учун қўшин ва полиция юборганликда, шунингдек, парламент спикери ҳамда ўша пайтдаги ҳукмрон ва бош мухолифат партиялари етакчиларини ҳибсга олишни ташкил қилганликда айбланди.
Айблов хулосасига кўра, Юн собиқ мудофаа вазири Ким Ён Хён ва бошқа расмий шахслар билан исён уюштириш учун тил бириктирган ҳамда мамлакатда уруш ёки шунга ўхшаш фавқулодда ҳолат мавжуд бўлмаган бир шароитда ноқонуний равишда ҳарбий ҳолат эълон қилган.
Махсус прокурор жамоаси собиқ президент учун ўлим жазосини сўраган эди. Жанубий Кореяда олий жазо чораси 1997 йилдан бери қўлланилмаган.
«Собиқ президент Юн Миллий ассамблея биносини яккалаб қўйиш ва асосий сиёсатчиларни ҳибсга олиш учун қўшин юбориш орқали унинг фаолиятини тўсиб қўйиш ва шу орқали парламент ишини узоқ муддатга фалаж қилишга интилганини инкор этиш қийин», — деди судья ҳукмни ўқиб эшиттирар экан.
Судьянинг таъкидлашича, ҳарбий ҳолат эълон қилинишининг ўзи исён деб ҳисобланмаслиги мумкин, бироқ Юн Сок Ёль ҳолатида айблов асосли, чунки у конституциявий орган ишини тўсиб қўйишга ҳаракат қилган.
Суд жараёнида 65 ёшли Юн Сок Ёль айбловларни рад этиб, президент томонидан фавқулодда ҳолат бўйича конституциявий ҳуқуқнинг амалга оширилиши исён деб ҳисобланиши мумкин эмаслигини таъкидлади. Унинг сўзларига кўра, у мухолифат партиялари томонидан ҳукумат ишига тўсқинлик қилингани сабабли шундай қадамга қўл урган.
«Бу фуқароларни бостирадиган ҳарбий диктатура эмас, балки эркинлик ва суверенитетни ҳимоя қилиш ҳамда конституциявий тартибни тиклашга бўлган уриниш эди», — деди.
Юн Сок Ёль билан бирга ҳарбий ҳолат иши бўйича яна бир неча киши судланди. Собиқ мудофаа вазири Ким Ён Хён 30 йилга, Сеул полиция бошқармаси собиқ бошлиғи Ким Бон Сик эса 10 йилга озодликдан маҳрум этилди.
2026 йил январь ойида Юн Сок Ёль ҳибсга олишга тўсқинлик қилгани учун беш йиллик қамоқ жазосини олган эди. Худди шу ойда Жанубий Кореянинг собиқ бош вазири Хан Док Су Юн Сок Ёлга исён уюштиришда кўмаклашгани учун 23 йилга ҳукм қилинганди. Февраль ойида суд собиқ ички ишлар вазири Ли Сан Минни ҳам шу айблов билан етти йилга қамоқ жазосига ҳукм қилди.
2024 йил декабрь ойи бошида Юн Сок Ёль ўз қарорини мамлакатни «коммунистик кучлар»дан ҳимоя қилиш билан изоҳлаб ва мухолифатни «давлатга қарши фаолият»да айблаб, Жанубий Кореяда ҳарбий ҳолат жорий этган эди. Фармон парламент қарори билан бекор қилинди. Кейинроқ депутатлар Юн Сок Ёлга импичмент эълон қилиш учун овоз беришди, Конституциявий суд эса апрель ойида буни тасдиқлади.
2025 йил июнь ойида Жанубий Кореяда муддатидан олдин президентлик сайловлари бўлиб ўтди ва унда мухолифатдаги Демократик партия етакчиси Ли Чжэ Мён ғолиб чиқди.