Жанубий Кореядан вақтинча четлатилган президент Юн Сок Ёл ҳарбий ҳолат жорий этилиши сабабли исён ва ҳокимият суиистеъмоли айбловлари билан қўлга олинди, деб хабар беради Yonhap.
Олий мартабали амалдорлар орасида коррупция ҳолатларини текшириш бўйича идора (CIO) маълумотларига кўра, Юнни қўлга олиш буйруғи маҳаллий вақт билан соат 10:33 да бажарилган. Бу мамлакат тарихида амалдаги президентнинг қўлга олиниши билан боғлиқ биринчи ҳолатдир.
Юн қўлга олиш жараёни олдидан қисқа видеоалоқа орқали ўз чиқишини эълон қилди. У ўзини таъқиб қилиш қонуний эмаслигини айтди, аммо «қон тўкилишига йўл қўймаслик учун» терговчилар ва полиция талабларига бўйсунишга қарор қилганини билдирди.
Президент Квачхондаги CIO идорасига сўроқ учун олиб кетилди. У Сеулнинг Ийван ҳудудидаги ҳибс марказида сақланади.
Қўлга олиш Юннинг резиденциясида содир бўлди ва терговчилар билан президент қўриқчилари ўртасидаги кўп соатлик музокаралардан кейин амалга оширилди, деб қайд этади Yonhap.
«Биринчи уринишдан фарқли равишда, хизматчилар ёки Президент хавфсизлик хизмати ходимлари қўлга олиш буйруғини бажаришга фаол қаршилик кўрсатмади», — деди CIO вакили. Полиция комплексга киришни таъминлаш учун 3000 га яқин ходимни жалб қилди.
Жорий йилнинг январь ойи бошида терговчилар Юнни қўлга олишга уринишган, аммо резиденциядаги хавфсизлик хизмати билан бир неча соатлик қарама-қаршиликдан сўнг, чекинишга мажбур бўлишган эди. Юн тергов учун уч марта чақирилган бўлса-да, унинг ҳеч бир чақириққа жавоб бермаганидан сўнг CIO қўлга олиш буйруғини сўраган.
Юн Сок Ёл 3 декабрь кечаси Жанубий Кореяда ҳарбий ҳолат жорий этган эди. У бунга «коммунистик кучлардан конституцион тартибни ҳимоя қилиш» зарурати билан изоҳ берган. Унинг сўзларига кўра, оппозиция ҳаракатлари туфайли бундай чора кўрилган.
Бир неча соат ўтиб, парламент президентнинг қарорига тўсқинлик қилди ва Юн уни бекор қилишга мажбур бўлди. Кейинги кунларда президент ва бошқа бир неча амалдорларга қарши исён, давлатга ҳиёнат ва ваколатларни суиистеъмол қилиш бўйича текширув бошланган.
14 декабрь куни Жанубий Корея парламенти иккинчи уринишда Юнга импичмент билдиришга овоз берди. Унинг президентлик ваколатлари тўхтатилди. Иш Конституциявий судга юборилди, у президентни лавозимдан олиш ёки тиклаш ҳақида қарор қабул қилиши керак. Ҳозирча суд қарор чиқармасдан, Юн Сок Ёл расман президент бўлиб қолмоқда.
