2025 йил 19 июнь куни Uzbekistan Airways авиакомпаниясининг Истанбулдан Тошкентга учаётган HY282 рейси бортида чақалоқ дунёга келди, дея хабар берди ташувчининг матбуот хизмати.
«Парвоз вақтида йўловчилардан бирида муддатидан олдин тўлғоқ бошланди. Бахтимизга, бортда 2 нафар шифокор бор эди, улар экипаж билан биргаликда зудлик билан барча зарур тиббий ёрдамни кўрсатишди», — дейилади хабарда.
Экипаж командирининг қарори билан самолёт Урганч аэропортига фавқулодда қўнишни амалга оширди, у ерда она ва янги туғилган ўғил болани шифокорлар кутиб олишди. Оила тезкорлик билан маҳаллий клиникага етказилди.
Uzbekistan Airways оилани фарзандли бўлгани билан табриклади ва экипажга миннатдорчилик билдирди: командир Михаил Ажгиревич, иккинчи учувчи Элёр Ҳошимов, борт кузатувчилари: Людмила Ли, Алина Ибрагимова, Диана Дю, Интизор Юсупова, Шуҳрат Эрназаров, Фозил Зухуров, Феруза Ражарова ва Шаҳзода Нуруллиева.
«Авиакомпания тасодифан ушбу рейсда бўлиб қолган шифокорлар Дилбар Шерипбаева ва Дилшод Нортожиевга алоҳида миннатдорчилик билдиради», — дея қайд этилди.
Урганчга қўнгандан сўнг самолёт Тошкентга учиб кетди.
Самолётларда болалар туғилиши унчалик кам учрайдиган ҳолат эмас. Январь ойида Тошкент – Нью-Йорк рейсида ҳам ўғил бола туғилган, ўшанда лайнер Исландияга қўнган эди.
2024 йил апрель ойида худди шу авиакомпаниянинг Тошкент – Истанбул рейсида ҳам ўғил бола туғилган.
