Ўзбекистонда фармацевтика компаниялари ва дорихоналарга лицензия беришда қўшимча талаблар жорий этилмоқда. Бу президентнинг 2025 йил 23 майдаги қарорида назарда тутилган.
2025 йил 1 сентябрдан бошлаб фармацевтика фаолиятини ёки дори воситаларини чакана сотиш фаолиятини бошлаш учун қуйидаги шартларни бажариш талаб этилади:
- биноларни (бу ерда фармацевтика фаолияти олиб борилади) ижарага олиш ёки текин фойдаланиш бўйича барча шартномалар солиқ органларида мажбурий рўйхатдан ўтказилиши керак;
- дори воситаларини сотишда карта ва бошқа электрон тўлов воситалари орқали тўловларни қабул қилиш имконияти.
Агар солиқ текшируви давомида компания контрафакт препаратларни (кирим ҳужжатларисиз) ёки рақамли маркировкасиз дори воситаларини сотиб олаётгани, ташиётгани, сақлаётгани ёки сотаётгани аниқланса, лицензия тўхтатилиши мумкин.
Бундан ташқари, 2025 йил 1 июлдан бошлаб Ўзбекистонга олиб кирилган дори воситаларини улгуржи ва чакана сотувчиларга фақат импортчи ташкилот ёки унинг расмий дилерлари орқали ва электрон ҳисобварақ-фактура асосида сотиш тартиби кучга киради. Яъни, импорт дори воситаларини фақат маҳсулотни ўзлари олиб кирган компаниялар ёки уларнинг расмий дилерлари сотиши мумкин бўлади. Мустақил воситачилар ва ваколатсиз ташкилотлар бундай препаратларни қонуний равишда сота олмайди.
Эслатиб ўтамиз, 2025 йил 1 апрелдан бошлаб Ўзбекистонга қатор дори воситаларини олиб кириш учун 2% миқдорида божхона божи жорий этилган. Улар орасида — антибиотиклар, оғриқ қолдирувчи ва яллиғланишга қарши, вирусларга қарши, гормонал ва бошқа препаратлар мавжуд.
