Ўзбекистонда 2026 йилдан бошлаб қишлоқ хўжалиги ерларини ижарага беришнинг янги тизими жорий этилади. Бу ҳақда Президент Шавкат Мирзиёев 2025 йил 2 декабрь куни Жиззах вилоятида ўтказилган йиғилишда маълум қилди.
Унинг сўзларига кўра, аниқ маҳсулот етиштириш шарти билан аукционга қўйилган 10 минг гектар ер бир йил давомида сотилмаяпти.
Шу муносабат билан эндиликда ерни ижарага олган фермер унда нима етиштиришни мустақил равишда ҳал қила олади. Қишлоқ хўжалиги вазирлиги матбуот хизмати аниқлик киритишича, гап аниқ маҳсулот етиштириш мажбурияти билан аукционга қўйилган ерлар ҳақида бормоқда.
Такроран аукционга қўйиладиган участкаларнинг бошланғич нархи 10 фоизга камайтирилади. Ижарадан олинган маблағлар тўлиқ саноат боғлари инфратузилмасини ривожлантиришга — сув, электр энергияси ва йўл ўтказишга йўналтирилади.
Зоминда Америкалик ҳамкорлар билан биргаликда 100 минг бош она пода қувватига эга ва йилига 9 миллион инкубацион тухум ишлаб чиқарадиган йирик зотли паррандачилик фабрикаси ташкил этилмоқда.
Президент ушбу ноёб лойиҳа мамлакат паррандачилик тармоғини янги босқичга олиб чиқишини таъкидлади.
Шавкат Мирзиёев 900 минг гектар лалми ва яйлов ерларининг 110 минг гектари захирада экани, уларни 20 мингдан зиёд кишини иш билан таъминлаб, озуқабоп, мойли экинлар ва саноат боғлари учун муомалага киритиш мумкинлигини танқид қилди. Масъул шахсларга ҳудуддаги яйловлардан самарали фойдаланиш бўйича уч йиллик дастур ишлаб чиқиш топширилди.
Давлат раҳбарининг сўзларига кўра, айни пайтда Бахмалдаги 14 минг гектар боғнинг 4000 гектари эскирган, улардан олинадиган ҳосилдорлик гектарига 10 тоннага ҳам етмайди. Шу муносабат билан «бахмал тажрибаси» жорий этилади: эски боғлар интенсив усулга ўтказилади, 2026 йилда уларга фақат сертификатланган кўчатлар экилади.
Бахмал боғбонлари учун ҳам қўшимча қўллаб-қувватлаш чоралари эълон қилинди: интенсив боғлар яратиш учун 3 йиллик имтиёзли давр билан 7 йил муддатга 14% ли имтиёзли кредитлар; шпалерга 20 минг сўмдан 70 минг сўмгача субсидиялар. Совутгичли омборлар учун фоиз ставкасининг бир қисми — базавий ставкадан ташқари 8% гача компенсация қилинади.
Мева-сабзавот маҳсулотлари экспортчилари ва боғбонларга қадоқлаш харажатларининг 50% ини қоплаш учун субсидиялар тўланади. Умуман олганда, Бахмалда ўз боғдорчилик тажрибаси яратилади, кейинчалик бу имтиёзлар бутун республикага тадбиқ этилади.