Ички ишлар вазири Азиз Тошпўлатов Аралаш яккакурашлар (ММА) ассоциациясига раислик қилди, дея хабар берди ИИВ матбуот хизмати.
Бу қарор ассоциациянинг навбатдан ташқари сайлов конференциясида бир овоздан қабул қилинди.
Аюбхон Раҳматуллаев ассоциация раисининг биринчи ўринбосари, Шуҳрат Анваров раис ўринбосари, Ҳожиакбар Ҳакимов бош котиб, Муродхон Тўраев эса ижрочи директор этиб сайланди.
Азиз Тошпўлатов аралаш яккакурашларни ривожлантириш дастурини тақдим этди. Лойиҳага кўра, ички ишлар органлари раҳбарлари ҳудудий спорт бошқармалари билан биргаликда аралаш яккакурашларга қизиқиш билдираётган иқтидорли ёшларни топиш ва уларни ривожлантириш учун шарт-шароит яратишга масъул бўладилар.
Алоҳида эътибор «уюшмаган ёшлар»га қаратилади — ИИВ қошидаги «Жар» спорт-соғломлаштириш марказида ва ҳудудий спорт мажмуаларида машғулотлар ва малакали мураббийлар ишлаши учун инфратузилма яратилади.
Мусобақалардан олдин спортчилар ИИВ тизимидаги муассасаларда бепул тиббий кўрикдан ўтишлари мумкин бўлади. Халқаро федерациялар билан ҳамкорлик бўйича музокаралар олиб борилмоқда, ҳакамлар ва мураббийларнинг малакасини ошириш режалаштирилган.
Миллий олимпия қўмитаси раисининг биринчи ўринбосари Отабек Умаров ҳам ички ишлар органлари ходимлари орасида ушбу спорт турига қизиқувчилар кўп эканини таъкидлаб, бу ёшлар учун янги имкониятлар эшигини очишига ишонч билдирди.
Келажакда аралаш яккакураш мураббийларининг спорт мактаблари билан ҳамкорлигини йўлга қўйиш, ҳудудларда бу спортни ривожлантириш учун шарт-шароитлар яратиш, ўтказилаётган мусобақаларда октагонларни ва мухлислар клублари фаолиятини ташкил этиш режалаштирилган, дейилади ИИВ матбуот хизмати хабарида.
Йиғилишда, шунингдек, Ўзбекистон Панкратион ва грэпплинг ассоциациясини Аралаш яккакурашлар ассоциацияси билан бирлаштириш маъқулланди.
Аралаш яккакурашлар (ММА) федерацияси 2018 йил март ойида ташкил этилган эди. Унга профессионал кикбоксинг бўйича жаҳон чемпиони Суннат Илясов раҳбарлик қилган, Отабек Умаров эса президент этиб сайланган, у 2020 йил август ойида ассоциацияни тарк этган.
Азиз Тошпўлатов 2025 йил март ойида Пўлат Бобожоновнинг ўрнига ИИВ раҳбари бўлган. Бунгача у ҳуқуқ-тартибот органлари тизимида турли раҳбарлик лавозимларида ишлаган. Апрель ойида Азиз Тошпўлатов Ўзбекистон Волейбол федерацияси раиси этиб сайланган эди. Август ойида унга генерал-лейтенант ҳарбий унвони берилган.
