Ўзбекистон президенти Шавкат Мирзиёев томонидан 2026 йил 27 январь куни ўтказилган ўта танқидий руҳдаги йиғилишдан сўнг, ҳуқуқни муҳофаза қилиш органлари тизимида қатор тайинловлар ва ишдан бўшатишлар амалга оширилди.
Йиғилишда давлат раҳбари ҳуқуқни муҳофаза қилиш органларининг кибержиноятчилик, уюшган жиноятчилик ва фирибгарликка қарши курашиш фаолиятини танқид қилиб, тизим мавжуд таҳдидларга бардош бера олмаяётганини таъкидлади.
Президент, шунингдек, ИИВ тизимидаги 186 млрд сўмлик маблағ талон-торож қилинганини эслатиб ўтди, бунинг оқибатида собиқ юқори мартабали мулозимлар ҳибсга олинган. Йиғилиш якунлари бўйича Тошкент шаҳар ИИББ бошлиғи Равшан Султонхўжаев ҳамда пойтахт прокурори вазифасини бажарувчи Анвар Ўрмоновга ҳайфсан берилди.
Миллий гвардия
Баҳодир Тошматов Миллий гвардия қўмондони этиб тайинланди. У бунгача Президент ҳузуридаги Хавфсизлик кенгаши котибининг ўринбосари лавозимида ишлаб келаётган эди.
Ушбу тайинлов Тошматов учун мазкур тузилмага қайтиш бўлди: у 2017—2020 йилларда ҳам идорага раҳбарлик қилган. Бу лавозимда у сўнгги олти йил давомида Миллий гвардияни бошқарган Рустам Жўраевнинг ўрнини эгаллади.
Ички ишлар вазирлиги
Миллий гвардиянинг собиқ қўмондони Рустам Жўраев ички ишлар вазирининг биринчи ўринбосари — Жамоат хавфсизлиги департаменти бошлиғи этиб тайинланди.
У ушбу лавозимда аввалроқ бюджет маблағларини талон-торож қилиш иши бўйича ҳибсга олинган Бекмурод Абдуллаевнинг ўрнини эгаллади.
Рустам Жўраев ҳуқуқни муҳофаза қилиш органларида катта тажрибага эга: у Миллий гвардиягача Тошкент шаҳар ИИББ ва мамлакат ФВВга раҳбарлик қилган.
ФВВнинг собиқ раҳбари Ботир Қудратхўжаев ички ишлар вазирининг биринчи ўринбосари — Тезкор-қидирув департаменти бошлиғи бўлди. У илгари ҳарбий прокурор ва Мажбурий ижро бюроси (МИБ) директори лавозимларида ишлаган.
Унинг мазкур лавозимдаги ўтмишдоши Аюбхон Раҳматуллаев вазифасидан озод этилди, унинг янги иш жойи ҳақида маълумот берилмаган.
ИИВ Жазони ижро этиш департаментига бунгача Тошкент шаҳрининг Олмазор тумани ҳокими бўлиб ишлаган Азизхон Умархонов раҳбар этиб тайинланди. У илгари ИИВ жамоат тартибини сақлаш тизимида раҳбарлик лавозимларини эгаллаган. Унинг ўтмишдоши, Жазони ижро этиш департаментининг собиқ бошлиғи Рустам Турсунов тергов остида бўлиб турибди.
Қайд этиш жоизки, президент Олмазор туманини Тошкентда жиноятчилик, хусусан, тан жароҳати етказиш ҳолатлари юқори бўлган туманлар қаторида тилга олган эди.
Президент Администрациясининг собиқ ходими Рустам Мирзаев ички ишлар вазири ўринбосари сифатида коррупцияга қарши комплаенс учун масъул бўлади.
Шунингдек, илгари Президент Администрациясида ишлаган Диёрбек Сатторов ички ишлар вазирининг кадрлар бўйича ўринбосари этиб тайинланди ва бу лавозимда аввалроқ ишдан бўшатилган Даврон Назармуҳамедовнинг ўрнини эгаллади.
Фавқулодда вазиятлар вазирлиги
Азизбек Икромов ФВВнинг янги раҳбари этиб тайинланди. У бунгача Фарғона вилояти ИИБ бошлиғи бўлган, ундан олдин эса ички ишлар вазири ўринбосари ва мудофаа вазири ўринбосари лавозимларида ишлаган.
Унинг фаолияти айнан ёнғин хавфсизлиги соҳасидан бошланган бўлиб, у ерда 17 йил давомида меҳнат қилган. Мазкур соҳа илгари ИИВ тузилмасида бўлган, ҳозирда эса ФВВ таркибига киради.