Миллий банклараро процессинг маркази (Humo тўлов тизими) 2025 йилнинг биринчи ярми якунлари бўйича молиявий кўрсаткичлари ҳақида ҳисобот берди.
2025 йил январь-июнь ойларида Humo’нинг соф фойдаси 124,3 млрд сўмни ташкил этди, бу 2024 йилнинг шу даврига нисбатан 73% кўп (71,8 млрд сўм).
Компания ҳисоботига кўра, айниқса иккинчи чоракда сезиларли ўсиш кузатилган. Апрель-июнь ойларидаги фойда 76,2 млрд сўмга етди, бу 2024 йилги кўрсаткичдан 2,2 баробар юқори (34,5 млрд сўм). Таққослаш учун, биринчи чоракда фойда ўртача ўсди (+28,7%): 48 млрд сўм, бир йил олдин 37,3 млрд сўм бўлган.
Иккинчи чоракда молиявий кўрсаткичларнинг кескин ўсиши тўлов тизими UzPaynet (Paynet тўлов хизмати) томонидан хусусийлаштирилгандан сўнг тарифларнинг кескин ошишига тўғри келди.
Умуман олганда, ярим йил ичида Humo’нинг даромади 224,9 млрд сўмгача (+60,4%), хизматлар таннархи эса 64,7 млрд сўмгача (+43,6%) ўсган.
Тақсимланмаган фойда (соф фойданинг солиқлар, дивидендлар ва бошқа мажбурий харажатлар тўлангандан кейин компанияда қоладиган қисми) 327,6 млрд сўмга (+93%), ялпи фойда (даромад ва таннарх ўртасидаги фарқ) эса 160,2 млрд сўмгача (+68,3%) етди.
Эслатиб ўтамиз, йил бошида Humo’ни сотиш бўйича ўтказилган савдоларда 65 млн доллар ёки 840,3 млрд сўм таклиф қилган Paynet тўлов хизмати ғолиб бўлгани маълум бўлган эди. Paynet Humo’ни сотиб олиш бўйича шартнома 2024 йил 25 декабрда тузилганини маълум қилди. Бироқ Давлат активларини бошқариш агентлиги бу ҳақда 2025 йил 13 январда, яъни қарийб уч ҳафтадан сўнг эълон қилган. Шунингдек, давлат органи бошқа талабгорларнинг таклифлари, тўлов шартлари ва шакли, активнинг бошланғич баҳоси ҳақидаги маълумотларни ошкор қилмади.
Шу билан бирга, Humo янги акциядор — «Paynet» АЖ қўлига 203,3 млрд сўм миқдорида тақсимланмаган фойда билан ўтди (яъни Humo 2024 йилнинг учинчи ва тўртинчи чораклари учун давлатга дивиденд тўламаган). Энди бу фойдани янги акциядор — Paynet олиши мумкин.
Humo’нинг 2024 йил якунлари бўйича соф фойдаси 168,3 млрд сўмни ташкил этди, бу 2023 йилга нисбатан 47% кўп. Шундай қилиб, компаниянинг 840,3 млрд сўмга баҳоланиши тахминан 5 йиллик фойдага тенг. Шу билан бирга, фойданинг йилига тахминан 50% ўсиш суръати аллақачон кейинги йилда баҳолаш мультипликаторини 2,5-3 йиллик фойдагача пасайтириши мумкин.
Таққослаш учун, 2022 йилда бошқа бир миллий тўлов тизими Uzcard’даги 75% улуш 210,1 млрд сўмга, бутун компаниянинг баҳоси эса 280 млрд сўмга сотилган эди. Молиявий ҳисоботга кўра, Uzcard’нинг 2023 йилдаги соф фойдаси 51,6 млн долларни, ўша йилнинг 9 ойи ичида эса 660,4 млрд сўмни (тахминан $51 млн) ташкил этган, бу сотув суммасидан, шунингдек Humo’нинг фойдасидан сезиларли даражада юқори.
Humo учун бўлиб-бўлиб тўлашдими?
Молиячи Отабек Бакиров 2025 йил февраль ойи бошида Давактив маълумотларига таяниб, Humo’да давлатнинг 65% улуши сақланиб қолаётганини, бу «хусусийлаштириш бўлиб-бўлиб тўлаш орқали амалга оширилганини» кўрсатаётгани ҳақида хабар берган эди.
2025 йил июнь ойида «Газета» билан суҳбатда Давлат активларини бошқариш агентлиги директори Акмалхон Ортиқов харидор Humo учун шартнома тузилгандан сўнг 3 ой ичида тўлиқ тўловни амалга оширганини айтди. Суҳбат чоғида у Paynet’нинг тўловни тўлиқ амалга оширганини маълум қилган.
Бироқ, Ягона интерактив давлат хизматлари портали (ЯИДХП) маълумотларига кўра, 100% улуш ҳанузгача Давактив номидан давлат ихтиёрида қолмоқда.
