2025 йил 12 июнь куни Ҳиндистоннинг Аҳмадобод шаҳридан Лондонга учаётган Air India авиакомпанияси самолётининг қулаши оқибатида 240 дан ортиқ киши ҳалок бўлди, деб хабар беради Reuters.
Рўйхатга олиш рақами VT-ANB бўлган Boeing 787 Dreamliner лайнери AI171 рейсини бажараётган бўлган ва баландликка кўтарилиш вақтида шифокорлар ва тиббиёт талабалари яшайдиган ётоқхонага қулаган.
Air India бортдаги 242 кишидан 241 нафари ҳалокатда ҳалок бўлганини тасдиқлади. Бир киши омон қолган. У Буюк Британия фуқароси Вишвашкумар Рамеш бўлиб чиқди.
У фавқулодда чиқиш эшиги ёнидаги 11A ўриндиғида ўтирган. Эркак Hindustan Times газетасига шундай деди: «Парвозга кўтарилгандан 30 сония ўтгач, қаттиқ шовқин эшитилди ва кейин самолёт қулаб тушди. Ҳаммаси жуда тез содир бўлди».
«Ўрнимдан турганимда атрофимда жасадлар бор эди. Қўрқиб кетдим. Ўрнимдан туриб югурдим. Атрофимда самолёт бўлаклари бор эди. Кимдир мени ушлаб олди, тез ёрдам машинасига ўтқазди ва касалхонага олиб кетди», — дея қўшимча қилди Рамеш.
Reuters манбасига кўра, бортда жами 217 нафар катта ёшлилар, 11 нафар бола ва 2 нафар гўдак бўлган. Улардан 169 нафари Ҳиндистон фуқаролари, 53 нафари Буюк Британия, 7 нафари Португалия ва 1 нафари Канада фуқароси бўлган, дея аниқлик киритди Air India.
Ҳалок бўлганлар сони ҳақида аниқ маълумотлар ҳозирча йўқ. Топилган жасадлар орасида лайнер йўловчилари ҳам, қулаш жойида бўлган одамлар ҳам бор.
Ҳалокатга учраган Boeing 787 Dreamliner самолёти тахминан 12 ёшда бўлган. Бу 2011 йилда тижорат рейсларини амалга ошира бошлаган «Орзу лайнери» иштирокидаги биринчи авиаҳалокатдир.
