Санкт-Петербургда деразадан тушиб кетган болани қутқариб қолган Ҳайрулло Ибодуллаевга Ўзбекистонга авиачипта сертификати топширилди. Бу ҳақда Вазирлар Маҳкамаси ҳузуридаги Миграция агентлиги матбуот хизмати хабар берди. Агентлик, эркак ушбу сертификатдан ўзига қулай вақтда фойдаланиши мумкинлигини аниқлаштирди.
Агентлик вакиллари Ҳайрулло Ибодуллаевнинг Қашқадарё вилоятидаги хонадонига ташриф буюрдилар. Унинг турмуш ўртоғи Гуллола Сафарова билан суҳбатда унинг қаҳрамонлиги барча учун намуна бўлганини таъкидладилар.
Гуллола Сафарованинг айтишича, турмуш ўртоғи унга шифохонадан қўнғироқ қилиб, қўлига гипс қўйилганини айтган. Нима бўлганини сўраганида, у еттинчи қаватдан тушиб кетган болани тутиб қолганини сўзлаб берган.
Аёл турмуш ўртоғини «Жасорат» медали билан тақдирлагани учун президентга миннатдорчилик билдирди.
Видеоалоқа орқали эри билан гаплашганда, у йиқилиб тушган боланинг аҳволини сўради.
Тўрт ойдан бери Санкт-Петербургда фаррош бўлиб ишлаётган Ҳайрулло Ибодуллаев ҳам эътибор учун президентга раҳмат айтди ва мукофот у учун кутилмаган бўлганини билдирди.