Ўзбекистон Президенти, Қуролли Кучлар Олий Бош Қўмондони Шавкат Мирзиёев ҳарбий таълим тизимини ислоҳ қилиш бўйича таклифлар билан танишди, деб хабар берди давлат раҳбари матбуот хизмати.
Тақдимот 2025 йил 21 февраль куни Хавфсизлик кенгаши йиғилишида берилган топшириқ ижроси доирасида бўлиб ўтди.
20 дан ортиқ хорижий давлат тажрибаси ўрганилиб, ҳарбий таълимни комплекс модернизация қилишни назарда тутувчи янги миллий модель ишлаб чиқилди.
Таклифларга кўра, Қуролли Кучлар Академияси негизида Ҳарбий хавфсизлик ва мудофаа университети ташкил этилади. Унинг таркибига Мудофаа вазирлигининг барча таълим муассасалари – 5 та институт, Сержантларни тайёрлаш олий мактаби, шунингдек, Авиация ва учувчисиз учиш аппаратлари мутахассисларини тайёрлаш мактаби (институт мақомида) киради.
Марказлашган вертикал тузилмани яратиш қўшинлар салоҳиятини ошириш, дуал таълимни кенгайтириш ва илмий ишланмаларни амалиётга жорий этишга қаратилган.
Сержантларни тайёрлаш олий мактабида етакчилик сифатларини ривожлантириш, замонавий қурол-яроғ ва тактикага ўргатишнинг янги тизими жорий этилади.
Бундан ташқари, тор мутахассисликлар бўйича “2+2” гибрид таълим модели жорий этилмоқда. Фуқаролик олий таълим муассасаларининг иккинчи босқич талабалари орасидан 18 та мутахассислик, жумладан, психолог, алоқачи, таъминотчи ва омборчи мутахассисликлари бўйича курсантлар саралаб олинади.
Шунингдек, битирувчи курсантлар учун Олий Бош Қўмондоннинг давлат стипендияси таъсис этилади. Унинг соҳиблари бакалавриатдан кейин 5 йил ичида ҳарбий олий ўқув юрти магистратурасига имтиҳонсиз кириш ҳуқуқини оладилар.
Бундан ташқари, 36 та йўналиш бўйича фуқаролик ва ҳарбий мутахассислик бўйича 2 дипломли тизим жорий этилмоқда, бу эса ҳарбий хизматчиларга хизматдан кейин ҳам фаол фаолиятини давом эттириш имконини беради.
Педагог кадрларни тайёрлаш учун ҳарбий ўқитувчиларни хорижий давлатларда ўқитиш ташкил этилади.
Президент тақдим этилган ташаббусларни маъқуллади ва уларни амалий рўёбга чиқариш бўйича топшириқлар берди.
