Самарқанд вилояти Пахтачи туманидаги тарих фани ўқитувчиси (21 ёш) Telegram-каналлардан бирида Муҳаммад пайғамбарни ҳақоратли сўзлар билан атаб қолдирган изоҳи учун 12 суткалик маъмурий қамоқ жазосини олди.
Изоҳ 2025 йил 30 декабрь куни қолдирилган. 7 январь куни ижтимоий тармоқларда ушбу изоҳнинг скриншотлари пайдо бўлди ва ёш йигитни жавобгарликка тортиш чақириқлари янгради.
2026 йил 9 январь куни ички ишлар органлари ходимлари ўқитувчининг телефонини кўздан кечириб, изоҳ у томонидан қолдирилганини тасдиқладилар. Улар Ўзбекистон Маъмурий жавобгарлик тўғрисидаги кодексининг 184-3-моддаси — «Миллий, ирқий, этник ёки диний адоватни тарғиб қилувчи материалларни тайёрлаш, сақлаш ёки тарқатиш» (базавий ҳисоблаш миқдорининг 50 бараваридан 100 бараваригача миқдорда жарима солишга ёки материалларни ва уларни тайёрлаш ҳамда тарқатиш воситаларини мусодара қилиб, 15 суткагача муддатга маъмурий қамоққа олишга сабаб бўлади) бўйича маъмурий баённома туздилар.
Шу куннинг ўзида Пахтачи туманида суд бўлиб ўтди ва ўқитувчи ўз айбига иқрор бўлган.
Суд 12 суткалик қамоқ жазосидан ташқари, унинг телефонини йўқ қилиш ҳақида қарор чиқарди ва унинг шахсий Telegram-профилидан фойдаланишини чеклади. Бундан ташқари, у қамоқда сақлангани учун 741,6 минг сўм тўлаши керак бўлади.
