Тошкентдаги ер усти ҳалқа метро линиясида барча 14 та станция ўртасидаги йўлларни реконструкция қилиш ишлари якунланди. Линияни йўловчи ташиш учун очиш 2025 йил ноябрь ойининг бошларига мўлжалланган, деб хабар берди метрополитен матбуот хизмати.
Хабарда айтилишича, мавжуд камчиликлар бартараф этилган. «Йўллар текисланди, эскирган шпаллар алмаштирилди, дренаж тизимининг ҳолати текширилди, шағал балласти назоратдан ўтказилди».
Бундан аввал «Ўзбекистон мустақиллигининг 30 йиллиги» деб номланган линия 2025 йил 18 октябрдан очилиши кутилган эди.
Ҳозирда линияни обкатка қилиш ишлари олиб борилмоқда, лаборатория вагони бўлган поезднинг тест ҳаракати ўтказилди. Тез орада «Москва» поездларининг тест ҳаракати бошланади.
Метро вакилининг сўзларига кўра, реконструкциядан олдин поездларнинг ҳаракат тезлиги 25 дан 50 км/соатгача бўлган. Линия қайта ишга туширилгандан кейинги лойиҳавий тезлик 60–80 км/соатни ташкил этади. Бу поездлар оралиғидаги интервалларни қисқартиришга имкон беради.
Эслатиб ўтамиз, ҳалқа линиясининг қурилиши 2017 йилда бошланган. У қисман собиқ трамвай линиясининг йўналишини такрорлайди. Дастлаб шаҳар электр поездини ишга тушириш режалаштирилган эди. 7 та станциядан иборат биринчи босқич (1–7-сонли станциялар) 2020 йил сентябрда очилган. Яна 5 та станция (8–12-сонли) 2023 йил апрелда ишга туширилган. Барча станциялар номларсиз — фақат рақамли белгилар билан очилган эди. Фақатгина 2023 йил август ойида ҳукумат уларнинг номларини тасдиқлади. Линиянинг сўнгги иккита станцияси — «Қипчоқ» ва «Турон» — 2024 йил март ойида очилган.