Ўзбекистонда фаолият юритган жиноий гуруҳ етакчиси сифатида қидирувда бўлган эркак Истанбулдан Тошкентга олиб келинди, деб хабар бермоқда Ички ишлар вазирлиги матбуот хизмати.
«Грязь» лақаби билан танилган 1993 йилда туғилган Ё. М. 2023 йилда Яшнобод тумани ИИО томонидан қидирувга берилган эди. 2025 йил 5 декабрь куни у мамлакатга қайтарилиб, тергов органларига топширилди.
ИИВ маълумотларига кўра, у Туркия ҳудудида терговдан яшириниб юрган ва вазирлик томонидан Давлат хавфсизлик хизмати ҳамда мамлакатнинг Истанбулдаги бош консулхонаси билан ҳамкорликда ўтказилган тезкор-қидирув тадбирлари давомида қўлга олинган.
Қўлга олинган шахс Жиноят кодексининг қуйидаги моддалари бўйича айбланмоқда: 112-модданинг 2-қисми (ўлдириш ёки зўрлик ишлатиш билан қўрқитиш), 164-модданинг 4-қисми (босқинчилик), 165-модданинг 3-қисми (товламачилик), 173-модданинг 2-қисми (мулкни қасддан нобуд қилиш ёки унга шикаст етказиш), 242-модданинг 1-қисми (жиноий уюшма ташкил этиш).