Тошкент марказидаги Grand Mir (собиқ «Россия») меҳмонхонаси ўрнида бошқа меҳмонхона қуриш режалаштирилган. Қарийб 3000 киши меҳмонхонани бузишга қарши давлат идораларига мурожаат имзолади.
Нималар юз бермоқда
2025 йил июнь ойи охирида ижтимоий тармоқларда меҳмонхона бузилиб, унинг ўрнига 3 та бино, жумладан, 30 қаватли бизнес маркази ҳамда савдо ва кўнгилочар марказ қурилиши ҳақида хабарлар тарқалди. Ижтимоий тармоқлар фойдаланувчилари норасмий маълумотларга таяниб, лойиҳанинг бош пудратчиси сифатида Koç Construction компанияси номини тилга олишди.
2025 йил июль ойи ўрталарида блогер Никита Макаренко Grand Mir ходимларига таяниб, икки блок, 9 қават ва 126 та хонадан иборат меҳмонхона сентябрдан бошлаб кейинчалик бузиш учун ёпилишини маълум қилди.
Ҳокимликдаги манбанинг қайд этишича, меҳмонхона биноси хусусий шахсга тегишли бўлгани сабабли у ўз мулкидан қонун доирасида фойдаланишга ҳақлидир.
Spot нашрига кўра, архитектура концепциясини Koç Construction билан биргаликда Sarıkoç холдинги таркибига кирувчи Design Factory компанияси ишлаб чиққан. Podrobno.uz нашри маълумотларига кўра, Design Factory вакили Шавкат Абдуллаев меҳмонхонани бузиш ишлари сентябрь ойида бошланиб, йил охиригача якунланиши кераклигини тасдиқлади.
Аҳолининг меҳмонхонани бузишга қарши мурожаати
2025 йил 20 август куни меҳмонхона жойлашган «Боғсарой» маҳалласи аҳолиси давлат органларига ижтимоий тармоқларда эълон қилинган мажмуа лойиҳаси қурилишига йўл қўймаслик тўғрисида жамоавий мурожаат ва петиция (ҳужжатлар таҳририят ихтиёрида мавжуд) йўллади. Мурожаатни 2727 нафар киши имзолаган. Нусхалари президент Халқ қабулхонаси, Вазирлар Маҳкамаси, Бош прокуратура, Қурилиш вазирлиги, Тошкент шаҳар ҳокимлиги ва шаҳар кенгашига юборилган.
Мурожаатда шаҳарликлар лойиҳа шаҳарсозлик, санитария ва сейсмик меъёрларни бузиши, шунингдек, Тошкентнинг 2045 йилгача бўлган бош режасига зид эканлигини қайд этишган. Ҳужжатда адвокат Сабина Сидакованинг сўровига жавобан «ТошкентбошпланЛИТИ» лойиҳалаш институти меҳмонхона жойлашган ҳудуд реконструкция зонасида эканини билдирган. Шу билан бирга, ушбу ҳудуд учун батафсил режалаштириш ишлаб чиқилмаган.
Тасдиқланган бош режага кўра, ушбу ҳудудда беш қаватдан баланд бўлмаган бинолар қурилишига рухсат берилади.
Бундан ташқари, аҳоли маҳалла инфратузилмасининг ортиқча юкланганлигига ишора қилмоқда. Уларнинг фикрича, бинолардан фойдаланиш, айниқса, электр энергияси таъминоти билан боғлиқ оғир вазиятни янада ёмонлаштиради.
Мурожаатда кўкаламзорлаштиришга алоҳида эътибор қаратилган. Унда Ўзбекистон президентининг экологик барқарорликни таъминлаш тўғрисидаги фармонига кўра, баландлиги 12 м дан юқори бўлган барча янги объектларда ҳудуднинг камида 25%ни кўкаламзорлаштириш назарда тутилиши кераклиги айтилган. Аммо лойиҳанинг визуал концепцияларида ушбу меъёр сақланмаган.
«Биз қулай атроф-муҳитга бўлган ҳуқуқни мустаҳкамлаган ҳолда, режалаштирилган қурилишга қарши овоз бермоқдамиз», — дейилади петицияда.
Аҳолида сейсмик хавфсизлик ҳам жиддий ташвиш уйғотмоқда. IV сейсмик хавфлилик тоифасига кирувчи «учта ўттиз қаватли» бинолар мажмуасини зич турар-жой массивларида жойлаштириш тақиқланади. Бундай лойиҳалар Шаҳарсозлик кодекси меъёрларини бузади ва зилзила содир бўлган тақдирда аҳолига тўғридан-тўғри таҳдид солади, дейилади петицияда.
Фуқароларнинг мурожаатида, шунингдек, лойиҳа «назарда тутилган тартибни қўпол равишда бузган ҳолда» жамоатчилик муҳокамасисиз «амалга оширилаётгани» қайд этилган.
Аҳоли очиқ муҳокамалар ташкил этиш ва жамоатчилик қурувчининг мажбуриятлари билан танишиши ва хавфларни баҳолаши учун лойиҳани мавжуд манбаларда эълон қилишни талаб қилмоқда.