Ўзбекистон Ғазо секторида турар жойлар, болалар боғчалари, мактаблар ва шифохоналар қурилишига муносиб ҳисса қўшишга тайёр. Бу ҳақда 2026 йил 19 февраль куни Вашингтонда бўлиб ўтган «Тинчлик кенгаши»нинг илк саммитида президент Шавкат Мирзиёев маълум қилди.
«Ўзбекистон «Тинчлик кенгаши»ни ташкил этиш бўйича тинчликпарвар ташаббусни қўллаб-қувватлади ва уни муваффақиятли амалга оширишда амалий иштирок этиш ниятини қатъий билдирди», — деди давлат раҳбари.
У кенгаш фаолияти «Ғазо секторини иқтисодий ва ижтимоий қайта тиклаш учун қулай муҳит шакллантириш имконини беришига» ишонч билдирди.
Шу билан бирга, президент таъкидлаганидек, ҳар қандай ташқи бошқарув механизми «албатта сектор аҳолисининг ички қўллаб-қувватлашига таяниши керак».
«Барча томонларнинг мувофиқлаштирилган саъй-ҳаракатлари низодан кейинги жараённинг барқарорлигини таъминлаш ва Ғазони тезроқ тиклаш учун шароит яратиш имконини беради», — деди Шавкат Мирзиёев.
«Учрашувимиз халқаро бирдамлик, тинчликпарварлик ва Яқин Шарқдаги вазиятни яхшилашга бўлган умумий интилишнинг ёрқин ифодасидир. Биз ушбу тарихий имкониятдан иқтисодиёти гуллаб-яшнаган ва барча аҳоли учун муносиб яшаш шароитларига эга бўлган янги Ғазони барпо этиш йўлида фойдаланишимиз керак», — деб қайд этди.
Шавкат Мирзиёев Вашингтондаги ҳозирги саммит АҚШ президенти Дональд Трампнинг «сиёсий иродаси ва прагматизми натижаси» эканини қўшимча қилди.
Шунингдек, у йиғилиш Дональд Трамп номидаги Тинчлик институтида (АҚШ Тинчлик институтига бундай ном декабрь ойида берилган эди) ўтаётгани рамзий маънога эга эканини айтди.
Саммитда Шавкат Мирзиёевни қутлар экан, Дональд Трамп уни яна бир бор ўз дўсти деб атади. Шу билан бирга, у президент фамилиясининг талаффузи мураккаблигини қайд этди.
«Мамлакатингиз аъло даражада ривожланмоқда. Сиз аъло ишлаяпсиз. Ҳеч қандай муаммо йўқ. Ҳар гал уни кўрганимда, у: «Бизда ҳаммаси яхши, муаммо йўқ», дейди», — деди АҚШ президенти.